Tuir Ministru Prezidensia Konsellu Ministru, Fidelis Leite Magalhães hatete, Konsellu Ministrus hala’o sorumutuk iha Auditóriu Ministériu Finansas, iha Dili, no aprova ona Rezolusaun Governu nian kona-ba ezonerasaun atuál Prezidente Konsellu Administrativu Rádiu no Televizaun Timor-Leste, E. P (RTTL, EP) no ba nomeasaun Prezidente Konsellu Administrasaun RTTL, EP, foun, José António Belo, ba períodu tinan haat, 2021-2024.
Proposta ida ne’e mai husi Ministru Asuntus Parlamentares no Komunikasaun Sosiál, Francisco Martins da Costa Pereira Jerónimo.
“Ne’e razaun konfidensia servisu, ne’e desizaun ida ne’ebé Konsellu Ministru konsidera proposta hafoin rona proposta husi Ministru Asuntu Parlamentares Komunikasaun Sosial fundamenta razaun hirak ne’ebé motiva desizaun proposta refere,”dehan nia iha konferensia imprensa iha Ministeriu Finansas Aitarak Laran, Dili (05/05).
Entretanto, José António Belo hanesan atuál Diret’or ba Media Online TEMPO TIMOR.
Molok ne’e, Prezidente RTTL-EP sesante Fransisco Gari Namkari hetan nomeasaun iha loron 9 fulan-Janeiru tinan 2019 ba mandatu tinan haat, maibé la konsege remata no to’o deit tinan rua.
Asisten Editor: Saturnina da Costa
