Diretór Jerál Administrasaun no Finansas-MOP, João Amaral hatete, husi 2024 to'o 2025, Governua halo despezu administrative ka eviksaun iha fatin-fatin, nune'e iha tinan 2025 hahú husi fulan-Janeiru to'o Jullu MOP liu husi Diresaun Administrasaun no Finansas-MOP halo ona pagamentu ba vitima afetadu hamutuk uma-kain 597 ho orsamentu $4.646.848.16.
“Uma-Kain 597 ne’e, kompostu husi Aimutin uma-kain ida ho nia orsamentu, $16,156.78, Bebonuk uma-kain 94 ho osan $472,247.78, Fomentu I iha uma-kain 94 ho osan $561.968.06, Fomento II iha uma-kain 265 ho osan $2,797,545.44, Bidau Senggol uma-kain 65 ho osan $ 374,496.71, Bidau Pasar Sengol uma-kain 25 ho osan $157,750.83, Kuluhun iha uma-kain 21 ho osan $150,585.62, Baucau iha uma-kain ida ho osan $327.78, Covalima uma-kain ida ho osan $3,546.67 no Bairo Pite/Andevil (ADN Hudi Laran) uma-kain 27 ho osan $122,311.49,” dehan Diretór Jerál ne’e ba Jornalista INDEPENDENTE, iha nia knar fatin Kaikoli, Kuarta (27/07).
Diretór Jerál hatutan, dadaun ne'e lista ne'ebé tama tan iha Diresaun Administrasaun no Finansas-MOP nian, total vitima afetadu hamutuk uma-kain 227 ne’ebé iha hela prosesu nia laran no tempu badak MOP sei halo pagamentu hotu.
Husi dadus 227 MOP liu husi nia Diresaun Administrasaun no Finansas prevee ona osan ho montante, $1,573,404.10.
Enkuantu, dadus 227 ne’e, kompostu husi Bairo Pite Aldeia Xamatama no Laloran iha uma-kain 57 ho osan $ 479.053.03, Bidau Santana Manu Mata uma-kain 14 ho osan $ 132,419.82, Alto Balide iha uma-kain 3 ho osan $6,596.61 no Komoro Moris Foun uma-kain 114 ho osan $707,305.80.
Aldeinde, iha Komoro, Aldeia Fomento I iha uma-kain 10 ho osan $ 74,646.12, Kuluhun uma-kain 19 ho osan $ 94,944.17, JL Vila (Rai Privado) uma ida ho osan $11,111,11, Kampung Alor iha uma-kain tolu ho osan $38,391.60.
Nune’e, iha Hudi Laran, Suku Fatuhada iha uma-kain 5 ho osan $25,585.58 no Marconi iha uma-kain ida ho osan $3,350.26.
Entretantu, Diretór Jerál ne’e akresenta, ba vitima afeitadu sira ne’ebé maka Governu halo pagamentu tarde tanba sira nia dokumentus balun presiza hadia fila-fali, liliu hanesan konta bankaria sira.
“Iha balun ita prosesa atraza oituan tanba Ministériu iha ekipa tolu depois dokumentus sei estabelese sira nia kode vendedor, tanba kode vendedor ne'e Ministériu Finansas mak prosesa, nune’e bainhira kode vendedor ne’e iha hotu ona hafoin halo prosesu pagamentu,” hakotu nia.
Enkuantu, iha tinan 2025, Diretór Jerál ne’e afirma, MOP prevee orsamentu millaun $5 hodi halo pagamentu ba vitima afetadu sira, maibé husi orsamentu ne'e la sufisiente, tan ne'e MOP prevee tan millaun $5 hodi halo pagamentu.
