“Lori Primeiru Ministru nia naran ho onra bo'ot ba ita hotu ne'ebé halibur iha ne'e bele fó netik biban hodi simu Saudozu Max Stahl nia sinzas ka urna. ita mak koñese Saudozu nia domin ba ita hotu no mós ita hotu ne’ebé hamrik iha ne’e hodi goja ukun rasik an, tanba nia mak fó sai ita nia situasaun iha rai laran ba mundu,”dehan nia iha Aeroportu Internasional Nikolau Lobato, Dili, kuarta horseik (15/12).

Tanba ne’e, Governante ne’e husu ba ema hotu atu fó apresiasaun ba Saudozu nia servisu, dedikasaun no sakrifisiu ne’ebé halo ba nasaun ida ne’e.

“Ho ida ne'e mak ita hotu ne'ebé iha ne'e fó apresiasaun ba nia oan, ba nia servisu hotu no sakrifisu ne'ebé nia halo ba Timor-Leste husi tempu uluk to’o ita ukun rasik an,”tenik nia.

Enkuantu, Saudozu Max Sthall hakotu iis iha Brisbane, Australia iha tuku 4.30 madrugada no halo kremasaun ba nia isin mate iha loron 12 fulan-Novembru 2021, iha Australia.

Nune’e, iha loron 15 fulan-Dezembru 2021, familia lori hikas Saudozu nia ahu kdesan ho aviaun Qantas mai iha Timor-Leste.

Tuir orariu Saudozu sei ba haloot iha semiteriu Santa Cruz Balide, iha loron 17 Dezembru tinan ne’e, enkuantu, fatin ne’e hanesan Saudozu nia subar fatin hodi halo gravasaun no hasai filmajem ba akontesementu masakre 12 Novembru 1991.

Entretantu, Saudozu Christopher Wenner "Max Sthall" moris iha loron 6 fulan-Dezembru 1954, iha Londres, no hetan kondekorasaun Ordem Grande Kolar husi estadu Timor no sai sidadaun espesial Timor-Leste iha Novembru 2019.

Asistente Editor: Saturnina da Costa