Governu Estende Mandatu Lere Anan Timur Featured

By Humberto dos Santos Outubru 06, 2017 1603
Lere Lere

DILI: Prezidente Repúblika, Francisco Guterres ‘Lú-Olo’, aprova ona proposta VII Governu Konstitusionál, hodi estende mandatu Xefe Estadu Maiór Jenerál Forsa Armada, Majór Jenerál Lere Anan Timur hodi kontinua lidera instituisaun F-FDTL ba tinan ida.

Xefe Estadu Lú-Olo aseita proposta Governu hafoin rona Konsellu Superiór Defeza no Seguransa nian.

Ne’e duni, liuhusi dekretu Prezidente Repúblika no 65/2017 nomeia hikas, Majór Jenerál Lere Anan Timur nu’udar Xefe Estadu Maiór Jenerál F-FDTL, Brigadeiru-Jenerál Filomeno Paixão nu’udar Vise-Xefe Estadu Maiór Jenerál no Koronél Falur Rate Laek nu’udar Xefe Estadu Maiór F-FDTL.

Ho dekretu prezidensiál, lider F-FTL na’in tolu ne’e sei kontinua kontinua nafatin sira-nia knaar hahú husi loron-6 fulan Outubru 2017 to’o 6 Outubru 2018.

Aleinde ne’e, liuhusi dekretu Prezidente Repúblika no 69/2017, Xefe-de-Estadu mós nomeia José António do Rosário Soares hanesan Sekretáriu Konsellu Superiór Defeza no Seguransa.

Antes ne’e, liu husi reuniaun Konsellu Ministru kontinua propoin ba Xefe Estadu hodi estende hikas mandatu na’in tolu ne’e nian.

Entretantu, Vise-Xefe Estadu Maiór Jenerál, Brigadeiru Jenerál Filomeno Paixão, hafoin soru-mutu ho Ministru Defeza hateten, hasoru malu hodi informa sinais atu prolonga mandatu Xefe Estadu Maiór Jenerál no ninia estrutura ba tinan ida. 

Rate this item
(0 votes)

Independente Digital TV