Ministru Prezidensia Konsellu Ministru, Fidelis Leite Magalhães hatete, iha alterasaun ne’e, lista ne’ebé kategoria ba traballadór benefisiáriu sira sei revee fila fali, hanoin ba traballadór sira ne’ebé hala’o sira-nia atividade oin-oin iha kondisaun direta espozisaun ba virus SARS-CoV-2 mak ohin luan liu duké ne’ebé prevee ona iha Dekretu-Lei anteriór, liuliu ho inkluzaun husi tékniku sira ne’ebé envolve ona iha programa vasinasaun kontra Covid-19, guarda prizionál no koveiru sira, entre sira seluk ne’ebé la abranje to’o oras ne’e.
“Valór suplementu remuneratóriu ida ne’e, sei finansia husi Fundu Covid-19 nian, variasaun entre dolar amerikanu $5 to’o $25 kada loron, tuir grau risku sira ne’ebé funsionáriu sira hasoru, tuir tabela ne’ebé aprova ho diploma ida ne’e,”dehan nia iha Palasiu Governu.
Nia hatutan, alterasaun hirak ne’ebé prevee iha diploma ne’e sei prodúz efeitu hahú husi loron 30 fulan-Abríl tinan 2020, data tama iha vigór husi Dekretu-Lei ne’ebé oras ne’e altera.
Direitu ba suplementu sira ne’e sei prolonga to’o loron 31 fulan-Dezembru tinan 2021, sein prejuizu ba posibilidade posteriór hodi halo estensaun liu husi intervensaun lejizlativa foun.
Entretantu, iha tinan kotuk Governu estabelese ona suplementu remuneratóriu ba funsionariu no traballadór sira ne’ebé servisu iha situasaun ba prevensaun Covid-19.
Traballador sira ne’e hanesan, mediku, PNTL, F-FDTL, jornalista, no tekniku eletrisidade no mós ekipa saneamentu.
Asistente Editor: Saturnina da Costa
