Projetu Dekretu-Lei, ne’e aprezenta husi Ministra Finansas, Santina José Rodrigues Viegas Cardoso, liu husi reuniaun Konsellu Ministrus, iha kuarta semana ne’e//

Diploma ida-ne’e ho objetivu atu garante, durante tinan 2025, pagamentu estraordináriu ba saláriu adisionál ida, nu’udar dalan atu rekoñese kompromisu no dedikasaun traballadór sira Administrasaun Públika nian no ninia ekiparadu sira.

Medida ne'e mantén prinsípiu universalidade, ne’ebé abranje titulár kargu públiku sira, funsionárius, ajentes, membru sira husi forsa defeza no seguransa, traballadór sira ne'ebé vinkula husi Lei Traballu nian no kontratadu sira Administrasaun Públika nian, ho exesaun kontratadus estranjeirus.

Enkuantu, pagamentu estraordináriu jeralmente korresponde ba montante saláriu ne'ebé simu iha fulan-dezembru tinan 2025. Nune’e atu garante uniformidade, montante ne’ebé aloka ba kontratadu sira, ekiparadu ho rejime jerál no limita ba grau no eskalaun másimu tabela salariál nian, hanesan kazu funsionárius no ajentes.

Entretantu, diploma ne’e estabelese mós katak pagamentu estraordináriu nia montante la bele liu saláriu Prezidente Repúblika nian.

Prosesamentu sei hala'o durante fulan-dezembru 2025, ne'ebé finansia husi verba sira ne'ebé disponivel iha orsamentu husi entidade empregadór ida-idak. Iha kazu sira ne'ebé rekursu orsamentál sira la sufisiente, pagamentu tenke fó prioridade ba traballadór sira ho saláriu ki'ik liu, ho montante restu sira ne'ebé asegura liu husi Orsamentu Jerál Estadu nian ba tinan 2026.