“Kazu ne’ebé aas liu iha Sentru Saúde Vera Crus, hahú husi fulan-Janeiru to'o fulan-Outubru tinan 2023, mak moras infesaun respiratoriu ho total pasiente hamutuk 15.552 no tuir fali mai diarea hamutuk 2.849,”dehan Xefe Interinu Klinika Vera Crus Pedro Augostu Mali, ba Jornalista Online INDEPENDENTE, iha knar fatin, kuarta (29/11).
Nia hatutan, kauza husi moras infesaun respiratoriu mai husi foer no mós rai rahun sira. Tanba ne’e, Xefe Interinu Vera Crus ne’e husu ba komunidade sira atu hamos uma laran, atu rai rahun labele iha no mós hadok an husi fatin foer.
Aleinde, nia dehan, iha Sentru Saúde Vera Crus aimoruk esensial balun mak dadauk ne’e stok aut, liliu aimoruk sarope paracetamol ba labarik sira.
“Ha'u atu klarifika uituan kona ba stok aimoruk ne'ebé iha Vera Krus, ne’ebé alista barak laiha, inklui mos aimoruk esensial balun ba labarik sira hanesan isin manas no sarope ba mear deit mós laiha, maibe ami tenta halo ona konfirmasaun ho farmasia munisipiu Dili no sira mós halo ona rekizasaun ba SAMES, maibé seidauk iha resposta,”tenik nia.
Ba aimoruk esensial balun ne’ebé laiha, nia dehan, sira mós iha alternativu balun hodi bele atende pasiente sira.
“Iha alternativu balun ne’ebé ami halo hodi bele atende pasiente hanesan aimoruk sarope la iha, maibé ita bele kalkula fila fali tableta ne'ebé iha, atu fahe ba pasiente sira, no dala barak familia nia oan ladun hemu aimoruk musan entaun rokomenda atu sira sosa”.
