Fulan 10, Na’in 1.348 Mate iha HNGV Featured

By Ekipa INDEPENDENTE Maiu 13, 2024 317
Sala Emerjensia HNGV. Foto:Dok. Sala Emerjensia HNGV. Foto:Dok.

DILI: Tuir dadus husi Hospital Nasionál Guido Valadares, iha fulan 10 nia laran, hahú husi fulan Jullu 2023 to’o Abril 2024, ema na’in rihun ida resin mak mate bainhira hala’o tratamentu iha ospital nasional.

Tuir dadus ne’ebé INDEPENDENTE asesu, hahú husi fulan Jullu 2023, fulan ne’ebé Elia dos Reis Amaral, simu pose nu’udar Ministra Saude, to’o iha fulan Abril tinan 2024, iha ona ema na’in 1.348 mak lakon vida ka mate.

Tuir dadus ne’e, iha fulan neen (6) ikus tinan 2023 nian, iha ema na’in 890 mak lakon vida.

Iha fulan Jullu iha na’in 132, Agostu na’in 131, Setembru na’in 146, Outubru na’in 166, Novembru na’in 151, no Dezembru na’in 164.

Dadus foun liu, iha fulan haat dahuluk tinan 2024, husi Janeiru to’o Abril, iha ema na’in 458 mak mate iha HNGV.

Iha fulan Janeiru na’in 189, fulan Fevereiru no Marsu na’in 131, no iha fulan Abril na’in 138.

Iha fulan neen daikus tinan 2023, sura husi Jullu to’o Dezembru, iha na’in 890 mak lakon vida.

Tenke troka ona Governu

Bazeia ba dadus ne’e, númeru mediu pasiente ne’ebé mate kada fulan iha fulan 10 ikus ne’e iha na’in 138 kada fulan.

Relasiona ho kestaun ne’e, Diretór Ezekutivu Asia Justice And Rights (AJAR), José Luis Oliveira konsidera ida ne’e nu’udar violasaun direitu umanus ne’ebé komete husi Ministra Saude, Elia dos Reis Amaral.

Maibé, nia dehan, tanba durante ne’e Primeiru Ministru, Parlamentu Nasionál no Prezidente Repúblika nonook de’it no kontinua husik Ministra Elia kaer ukun, nune’e violasaun direitu umanus ne’e konsidera komete husi estadu.

“Ne’e violasaun direitu umanus ne’ebé komete husi Ministra (Elia), maibé tanba PM, PN no PR nonook de’it no kontinua husik Ministra Elia inkompetenti kaer ukun, mak violasaun direitu umanus ne’e komete ona husi Estadu, husi aktu omisaun (abandona),” dehan J.Luis ba Jornalista Jornal INDEPENDENTE via WhatsApp, Domingu (12/05).

Tuir loloos, nia dehan, tenke tuun hodi halo manifestasaun hodi ezije atu troka ona governu ne’e.

“Tuir loloos tenke troka Governu ona, maibé PR no PN husik mak povu tenke tuun (halo) manifestasaun ezije troka governu,” dehan nia.

Rate this item
(0 votes)

Independente Digital TV