Nune’e, atu ultrapasa situasaun ida ne'e, entidade relevante sira hotu, tenki hala’o nia papel atu kontribui hodi bele reduz violensia kontra feto no labarik feto.

"Ita hanoin katak NGO forum halo knar ida oinsa atu fasilitia komunikasaun entre organizasaun sosiedade sivil ho governante sira liu husi forum dialogu, entaun ita nia knar iha ne'e konvida governante no parlamentu sira depois fasilita membru sira, liu-liu rede feto no organizasaun sira ne'ebé servisu ba feto,”dehan nia iha salaun CNE Kaikoli, sesta horseik (08/10).

Tuir nia, papel rede feto nia mak atu halo komunikasaun ho governu sira kona ba sira nia rekomendasaun sira.

Forum dialogu ne’e, nia ultimu mak konsensus, signifika oinsa rekomendasaun sira husi sosiedade sivil, governu, parlamentu bele konsidera no mós sosiedade sivil bele kontinua halo nia papel hanesan parseiru kritiku ho governu.

"Ita halo servisu parseiru kritiku ne'e intermus suplai dadus informasaun evidensia sira para ajuda parlamentu no ajuda governu halo desizaun ne'ebé bele fo resposta ba problema ne'ebé ita infrenta liu-liu violensia hasoru feto no labarik,”tenik nia.

Nia hatutan, iha Timor-Leste lejislasaun lubuk ida ne'ebé proteje ba vitima sira husi violensia domestika no labarik feto sira.

"Ita iha kodigu penal no Ita mós iha Lei violensia domestika, lei sira ne'e protejidu ne'ebé agora ita nia preukupasaun lei lejislasaun iha ona maibé oinsa mak atu komprementa ba lejislasaun sira ne'e mak sei sai dezafiu". Nia esplika.

Iha fatin hanesan, Diretór Jéral Sekretariu Estadu Igualidade no Inkluzaun (SEII), Armando da Costa hatete, violensia hasoru feto, bazeia ba peskiza, tuir dadus demokrasia survei nian, em-jéral iha Timor-Leste feto mak iha esperensia ba violensia, hahu husi tinan 15-49. Ida ne'e akontese husi sira nia parseiru ou kualker mane ida ba sira. 

Atu bele redusaun problema ne'e governu liu husi SEII ho parseiru hotu estabelese ona planu asaun nasional kontra violensia bazea ba jeneru.