FONGTIL: ‘Moe’ Netik ba, Deputadu CNRT Featured

By Cristina Ximenes Juñu 02, 2020 3361
Deputadu CNRT halo barullu iha Parlamentu Nasional, iha loron 19 fulan-Maiu 2020. Foto INDEPENDENTE Deputadu CNRT halo barullu iha Parlamentu Nasional, iha loron 19 fulan-Maiu 2020. Foto INDEPENDENTE

DILI: Asaun deputadu husi bankada CNRT, UDT/FM, no PUDD ne’ebé falta iha plenaria Parlamentu Nasionál (PN) no enkontru komisaun sira hamosu preokupasaun husi sosiadade sivil sira.

Forum Organizasaun Naun-governamental Timor-Leste (FONGTIL) ne’ebé nu’udar sumbriña ba ONG iha TL husu ba deputadu sira husi bankada tolu ne’e atu tenke iha moral.

Diretór FONGTIL Daniel Santos do Carmo hatete, maske asaun abandona plenária ka walk out sai nu’udar jogu politiku ne’ebé baibain akontese iha nasaun demokratiku, maibé bainhira koalia kona-ba kestaun vensimentu, deputadu sira tenke iha moral.

“Agora saida mak ko’alia kona-ba vensimentu ne’e ita ko’alia kona-ba moral. Se ha’u la halo servisu maibé fulan-fulan ha’u simu osan signifika ha’u iha problema kona-ba moral, tanba ne’e mak ita dehan osan ita simu ne’e ho ita-nia kosar-been, (la serbisu mais simu osan) ne’e ita kategoria haan matak (osan),” dehan Daniel ba jornalista jornál INDEPENDENTE iha nia kna’ar fatin Kaikoli, Segunda (01/06).

Diretór ne’e dehan, deputadu sira husi CNRT, UDT/FM, no PUDD presiza buka oinsa atu partisipa iha plenaria PN hodi fó solusaun ba dezafiu, halerik, no problema ne’ebé povu enfrenta hela.

“Ita lamenta tanba sira la sensivel ba problema sosiál no sira moralmente defisiente bainhira sira-nia direitu povu garante, estadu garante, maibé sira la halo di’ak iha sira-nia kna’ar,” dehan nia.

Molok ne’e, deputadu bankada CNRT, UDT/FM, no PUDD deklara katak sira sei la partisipa iha kualker atividade PN tanba sei hein desizaun husi Tribunal Rekursu.

Entretantu, TR fó sai ona ninia desizaun hodi indefere pedidu ne’ebé CNRT hato’o ba tribunal. Maske nune’e, deputadu CNRT, UDT/FM, no PUDD seidauk hola parte iha plenaria PN.

Tuir Xefe Bankada CNRT Duarte Nunes, deputadu sira husi bankada CNRT sei halo enkontru hodi deside bainhira mak sei partisipa iha plenaria PN.

"Orsida mak ami tuur hamutuk, sei deside bainhira mak atu tuir plenaria, ami sei hein kolega balun seidauk mai, ami hein mai hotu mak ami tuur hamutuk par deside," dehan Duarte iha PN, horisehik.

Rate this item
(0 votes)

Independente Digital TV