Insendente ne’e akontese iha Reinaldo servisu fatin, iha Postu Komponente Navál, neʼebé lokaliza iha bairru Oébau, Suku Costa, Sub-rejiaun Pante Makasar, Rejiaun Administrativu Espesiál Oekusse-Ambeno (RAEOA), iha 10 Juñu, maizumenus tuku 09:30 dader.

Komandante Komponente Naval F-FDTL, Komodoro Higinio das Neves, ne’ebé hala'o vizita servisu iha Oekusse to'o kedas fatin akontesimentu hodi halo observasaun no prepara evakua membru refere ba Komponente Naval Metinaro, Dili.

Tuir deklrasaun husi Komodoro Higinio ne’ebé jornalista Jornal INDEPENDENTE sira husi live streaming STL katak, nia mós seidauk hatene motivu husi kazu ne’e.

“Akontesimentu ne’e mós derrepente de’it, foin daudaun (matebian) nia-oan moras uitoan, komandante postu autoriza nia ba vizita família sira iha uma, iha semana rua liu ba, nia foin mak fila fali mai, agora sira iha ne’e, problema iha mós ha’u seidauk hatene, orsida ha’u sei husu sira atu ko’alia mai mak ita foin hatene tanba saida mak akontese hanesan ne’e.”

"Situasaun mak ne’e, ita seidauk hatene. Ha'u hatete polisia mai par halo investigasaun hodi haree keta buat ruma halo nia oho aan, entaun investigasaun ne’e oinsa atu haree, maibé situasaun ne’e mosu derrepente, ita la hatene no laiha planu," katak nia.

Ba kazu ne’e, Jornalista sira koko halo konfirmasaun ho Xefe Estadu Maior F-FDTL Tenente Jeneral Falur Rate La'ek, maibé seidauk iha informasaun ruma hodi hato'o nia posizaun no komentariu.

"Maun, CEMGFA (Xefe Estadu Maior F-FDTL General Falur) sira sei reuniaun", dehan Ofisial Média F-FDTL bá Jornalista sira né'ebe konfirma atu halo intervista.

Entretantu, ba kazu ne’e, Diretór Fundasaun Mahein, Nelson Belo husu atu halo investigasaun komprensivu no klean hodi bele hatene kauza husi kazu ne’ebé akontese.

Atu nune’e, bele sai sai lisaun hodi bele dezeña politika ida atu bele halo prevensaun ba futuru.

"Fundasun Mahein nia analiza katak pesoál militár sira oho an hodi tiru sira-nia an rasik mak preokupasaun ida ne'ebé signifikativu no buras, ho kilat sira hanesan metodu ne'ebé komún liu no letal liu ne'ebé uza iha suisídiu sira ne'e."

Tuir dadus, Nelson dehan, liu 90% husi suisídiu militár sira mak husi mane sira ho idade menus husi tinan 35, no kilat sira mak kontribui ba maioria husi mate sira ne'e tanba sira-nia letalidade aas sai kauza prinsipál sira ba pesoál militár sira-nia suisídiu ka tiru an.

Tan ne’e, Nelson rekomenda ba parte PNTL no mós F-FDTL atu halo investigasaun ne’ebé klean.