FDCH sei Atribui Bolsa Estudu ba Estudante Mellór Klafisifiku Featured

By Ekipa INDEPENDENTE Dezembru 04, 2023 14464
Diretór Ezekutivu FDCH, Julio Aparicio. Foto:Media FDCH. Diretór Ezekutivu FDCH, Julio Aparicio. Foto:Media FDCH.

DILI: Fundu Dezenvolvimentu Kapital Umanu (FDCH) sei tuun direta halo identifikasaun ba estudante Eskola Sekundaria Jerál no Eskola Tékniku Vokasionál sira iha nível territóriu timor laran tomak ne’ebé mak mellór klasifikadu bele hetan direitu bolsa estudu hodi kontinua ba Ensinu superiór.

Diretór Ezekutivu FDCH, Julio Aparicio informa, Governu Konstitutional dasia nafatin konsistente ho politika hodi ezekuta programa bolsa estudu liu husi FDCH ne'ebé mak responsavel ba ezekusaun.

Nia dehan, programa bolsa estudu ba estudante tomak iha rai-laran ho objetivu prinsipál atu enkoraza no motivasaun, liu-liu atu kria dezenvolvimentu rekursu umanu ba nasaun Timor-Leste ba dezenvolvimentu nasionál agora no futuru.

“FDCH rasik ho komitmentu boot teb-tebes hodi ezekuta programa bolsa estudu ne'e, tanba ne'e politika Governu ne'ebe mak bele hasa’e kapasidade estudante nia prestasaun no bele dezenvolve ita-nia nasaun bainhira gradua ona sira-nia estudu iha rai laran no rai li’ur,”  Diretór Ezekutivu FDCH, Julio Aparicio, ba Jornálista INDEPENDENTE, iha edifisiu FDCH, Kinta  (30/11).

Julio haktuir, FDCH hala'o ninia kna’ar ho espiritu responsabilidade ne'ebé ho komitmentu boot, tanba ne’e FDCH rasik hala'o vizita ba kada eskola hodi rekoila dadus estudante ne’ebe mak iha prestasaun no merese simu bolsa de estudu tuir rekezitus ne'ebe aplikavél bazeia dekretu-lei númeru 79/2022 no numeru 13/2023 ne'ebe mak sai hanesan politika fundamentu ba FDCH, atu  ezekuta politika Guovernu ba asuntu bolsa estudu ba estudante Timor-oan hotu.

“Karik ita ezekuta politika bolsa estudu ne'e tuir estandar valór kada Estudante entaun, tuir rekezitus valór kada estudante husi Siensia sosiais tenke hetan valór 2,75 no Siénsia naturais  valór 3.0, maibe realidade ne’ebé deside ona hodi hatama balun ne’ebe mak valór la to’o,” nia hatete.

Nia informa, Tanba ne’e FDCH presiza haree estudante sira-ne'ebe iha prestasaun estudu ne'ebe di’ak fó bolsa estudu,  hodi dezenvolve nasaun Timor-Leste iha futuru mai.

“Total estudante hotu ne'ebe mak hetan ona bolsa estudu iha rai laran mak 4.892 estudante no no rai liur mak hamutuk 5.514 estudante,” nia informa.

Nia fundamenta, husi totál estudante 4.892 sira-ne'ebe mak hetan ona bolsa estudu iha rai laran ne’e kobre ba universidade hotu iha rai laran no 5.414 estudante iha rai-li’ur ne’e sira eskola iha Indonézia, Singapura, Malázia, Mocambique, Portugal, Brazil, Thailand, Kuba, England, Filipina, Caboverde no España no nasaun sira seluk.

Rate this item
(9 votes)

Independente Digital TV