FDCH Fasilita Bolsa Hakbi'ik Ba Estudante UNTL Hamutuk 480

By Rufino dos S. Barreto Agostu 17, 2021 458
Reprezentante estudante UNTL na'in 480 asina kontratu ho FDCH ba programa Bolsa Hakbi'it. Foto: Rufino/Independente. Reprezentante estudante UNTL na'in 480 asina kontratu ho FDCH ba programa Bolsa Hakbi'it. Foto: Rufino/Independente.

DILl: Sekretariado Tekniku Fundu Dezenvolvimentu no Kapitál Umanu (ST-FDCH) hamutuk ho Ministeiu Ensinu Superior Siénsia no Kultura (MESSK), tersa ohin, asina ona kontratu   ho estudante Universidade Nasional Timor Lorosa’e (UNTL) hamutuk 480, hodi asesu ba programa Bolsa Hakbi’it husi Fundu Dezenvolvimentu Kapital Umanu.

Diretór Ezekutivu FDCH, Hermenegildo da Silva hatete, bolseiru na’in 480 ne’e sei hala’o estudu iha UNTL ho nivel estudu hahú husi Diploma III (D3) to’o Lisensiatura (S1), iha area fakuldade Agrikultura, Enjeñaria, Edukasaun, Direitu, Ekonomia, Siénsia Sosial no Filozofia.

“Ohin estudante na’in 480 husi UNTL asina kontratu ba programa Bolsa Hakbi'ik,”dehan nia iha UNTL-Liceu, tersa ne’e (17/08).

Enkuantu, kada fulan estudante ida sei hetan osan montante dolar amerikanu $120.

Tanba ne’e, nia husu ba bolseiru sira atu iha responsabilidade ba investimentu ne’e ho diak.

Nia akresenta, iha fulan kotuk FDCH intrega ona estudante na’in 20 husi Instituto Politekniku Betado (IPB) no ohin fasilita tan estudante UNTL na’in 480.

Ho nune’e, kada fulan tolu sei halo fiskalizasaun ba valor sira ne’e, ba bolseiru sira ne’ebé iha Siensia Sosiais tenki ho valor 3,0 no 2,75.

“Hirak ne'ebé hetan programa Bolseiru Hakbi'it ida ne'e, tenki estuda maka'as no tenki halo tuir regras sira ne'e,”tenik nia.

Tuir nia, orsamentu ne’ebé preve iha tinan 2021 ba programa Bolsa Hakbi’it hamutuk dolar amerikanu tokon $ 1.5.

Entretantu, Reitor UNTL João Soares Martins agradese ba Governu liu husi MESSK ne’ebé iha inisiativa hodi oferese ona bolsa estudu ba familia kbiit laek sira hala’o estudu iha banku ensinu superior.

Iha fatin hanesan estudante UNTL, Leonito M. da Silva agradese ba FDCH ho MESSK ne’ebé oferese ona bolseiru ba sira liu husi programa Bolsa Hakbi’it.

 

Asistente Editor: Saturnina da Costa

Rate this item
(0 votes)
Last modified on Tersa, 17 Agostu 2021 21:25

Independente Digital TV