Vise Primeiru Ministru no Ministru Kordenador Asuntu Ekonomiku no Turizmu no Ambiente, Francisco Kalbuadi Lay hateten, halo sentru konvensaun ne’e aloka duni tokon US$ 5 ba primeiru halo lai preparasaun ba estudu, iha Portu Dili.
Nia fundamenta, iha Portu Dili ne’e, iha loron ida hamutuk Primeiru Ministru, Prezidente Republika no Primeiru Ministru Malaizia nian, halo ona lansamentu no depois de estudu tinan oin mai Janeiru bele hahu.
“Ho apoiu tomak ita-boot sira nian sentru konvensaun ne’e sei akontese duni, tanba tama ba AEAN iha kriteria ida númeru 7 ne’e dehan katak infraestrutura, ita mós tenke prepara ita nian liu-liu ba iha fasilidade ne’ebé atu halo konvensaun internasional liu-liu iha ASEAN nian,” dehan Kalbuadi, iha plenaria PN, Sesta (14/11).
Entretantu, Xefe Bankada Partidu Libertasaun Popular (PLP), Maria Angelina Sarmento hateten, iha pedidu esklaresimentu ba Ministru Kordenador Asuntu Ekonomiku tanba ministeriu ne’ebé iha papel boot tebtebes atu halo kordenasaun ho ministeriu relevante iha área ekonomika, tanba ne’e atu osan tokon US$ 5 iha atividade ne’e ligadu ho MKAE.
Entretantu, Deputada Bankada Fretilin, Lidia Norberta hateten, halo de’it estudu viabilidade ida de’it maka gastu kedas tokon US$ 5, oinsa tan ho ninia kontrusaun ne’e atu gastu tan hira.
“Ho ida ne’e ami atu hatete mós imajina ke estudu de viabilidade ida de’it ba halo sentru de konvensaun maka tokon US$ 5, entaun ninia konstrusaun rasik hira ne’e pergunta ida ne’ebé ami hakarak ita boot atu esklarese,” dehan nia.
