Estudante sira kontente Simu Liurai Brunei Darussalam mai TL Featured

By Ivonia Varela Maiu 20, 2024 274
Estudante ho manorin sira kontenti simu Liurai Brunei Darussalam, Haji Hassanal Bolkiah ne’ebé vizita Timor-Leste. Foto:Media PR. Estudante ho manorin sira kontenti simu Liurai Brunei Darussalam, Haji Hassanal Bolkiah ne’ebé vizita Timor-Leste. Foto:Media PR.

DILI: Estudante ho manorin sira kontenti simu Liurai Brunei Darussalam, Haji Hassanal Bolkiah ne’ebé vizita Timor-Leste, atu partisipa loron Restaurasaun Indepedensia ba dala-22.

Hahú husi tuku ualu liu, estudante sira husi área Komoro forma husi dalan protukolu nian, hahú husi Rotunda Nikolau Lobató to’o iha Palasiu Prezidensiál hodi hein no simu Liurai Brunei Darussalam Haji Hassanal Bolkiah Mu’izzaddin Waddaulsh.

Koordenadór Ensinu Baziku Filial 05 de Maiu, Komoro, Anacleto Martins hatete, nia parte simu ona ordem husi Ministeriu Edukasaun (ME) hodi organiza estudante sira atu simu Liurai Brunei ne’ebé mai vizita nasaun Timor-Leste.

Tan ne’e, EBF Komoro prepara estudante hamutuk rihun ida atus lima (1500) hodi hamriik iha dalan protokulu nian.

“Ami simu ordem husi Ministeriu Edukasaun atu simu ita nai liu-rai sultan ne’ebé atu vizita ita nia nasaun ohin dadersan ami 05 Komoro mós envolve iha fatin ne’e ho ami nia total estudante 1500 ho profesor hamutuk na’in 48,” dehan Koordenadór Eskola iha Rotunda Nicolau Lobato Komoro, Segunda (20/05).

Entretantu, tuir observasaun Televizaun Independente nian iha terrenu nota katak, hafoin tuku sanulu liu minutu balun, Liurai Brunei Darusalam to’o iha Aeroportu Internasional Nicolau Lobato, Dili, ne’ebé simu husi Prezidente Republika José Ramos Horta no Primeiru Ministru Kay Rala Xanana Gusmão.

Televizaun independente mós observa katak, iha vizitasaun sua majestades sultan Haji Hassanal Bolkiah Mu’izzaddin Waddaulah ne’e, estudante no manorin sira maske loron manas maibé sira nafatin hamriik iha dalan ninin, balun kaer Bandeira RDTL no balun kaer bandeira Brunei Darusalam nian hodi simu liurai ne’e.

Ho nune’e, estudante sira ne’ebé forma tuir dalan simu ho kontenti no haklalak ho lia fuan sultan no mós dram band, hahú husi Rotunda Prezidente Nikolau Lobato to’o iha Palásiu Prezidensiál no hetan seguransa masimu husi Polisia Nasional Timor-Leste.

Hafoin liurai ne’e liu iha área Komoro nian, estudante sira hahú husi ensinu baziku to’o iha universidade nafatin kaer bandeira RDTL no Bandeira Brunei Darusalam nian, hodi tuir na’in ulun sira ne’ebé liu dadauk ba fatin destinasaun.

Enkuantu, estudante ne’ebé forma iha dalan ninin, simu liurai Brunei Darusalam ne'e mak, mai husi eskola São Pedro Komoro, EBF 5 de Maiu, EBC 30 Agusto, EBF Bebonuk, EBF Ai-mutin, EBC 10 dezembro no Ensinu Sekundariu 10 Dezembro, EBF 04 Fatuhada, Annur, EBC Farol, Kristal, Universidade Nasional Timor-Lorosa’e no seluk tan.

Rate this item
(0 votes)
Last modified on Segunda, 20 Maiu 2024 20:04

Independente Digital TV