Portavós baze estudante UNPAZ, Joelfin Loi Ximenes Varela hatete, estudante sira konsidera regra ne’e hanesan restrisaun ba liberdade espresaun no parte husi direitu demokrátiku sidadaun sira.

“Ami kontra total desizaun ne’e, no husu Parlamentu Nasionál atu altera lei 100 metru ba manifestasaun,” nia hatete liu husi konferensia imprensa, iha UNPAZ, Kuarta (11/06).

Nia dehan katak Konstituisaun RDTL Artigu 40 no 41, garante liberdade espresaun no imprensa, no estadu tenke asegura direitu ne’e ba sidadaun hotu.

Iha deklarasaun hanesan, Fidelio Cardoso de Jesus husi EUTL mós husu Parlamentu atu foti responsa kona-ba akordu ne’ebé mak prevé diskusaun kona-ba lei metru 100, ne’ebé to’o agora seidauk implementa.

Estudante sira afirma katak, iha fatin seluk, governasaun fó prioridade ba tema seluk hanesan kriminalizasaun defamasaun, ne’ebé sira konsidera bele limita liberdade sira nia espresaun.

Sira mós kritica katak lei sira hanesan ne’e bele benefisia liu de’it elite polítiku, enkuantu povu komun kontinua hasoru problema iha setór estratéjiku hanesan edukasaun, saúde no infraestrutura.

“Ami haree katak edukasaun, saúde no infraestrutura iha área remota sei la di’ak. Povu hakarak mudansa ruma iha sira nia moris loroloron,” dehan representante estudante sira.

Estudante sira husi UNPAZ no EUTL mós hatete katak se Parlamentu Nasionál la responde ba sira-nia apelu, sira sei kontinua mobilizasaun ho forma pasífika hodi defende liberdade espresaun no direitu demokrátiku.