Vise Kordinator Sentru Integradu Jestaun Krize (SIJK) Dra, Odete Viegas reafirma katak vasinasaun AstraZeneca ne’e too Timor-Leste iha loron 5 fulan-Abril husi Organizasaun Saude Mundial (WHO) liuhusi COVAX hamutuk dose rihun 24. Tanba ne’e iha loron 7 fulan-Abril kontinua ho lansamentu dahuluk.
"Ema dahuluk ne’ebe simu vasina ne’e mak Primeru Ministru Taur Matan,Ruak, tuir fali fai mak Presidente Parlamento Nasional Aniceto Longinhos Guterres idepois membru governu sira tuir, inklui Amu Bispo Metropolitanio Dili Dom Virgilio do Carmo da Silva mos hola parte maibe bainhira koko nia tensaun sae oituan antaun mediku sira haruka nia ba deskansa durante semana ida, e loron tolu liu ba ita nia Bispo Dom Virgilio mos hetan tiha ona vasina,"dehan Dra. Odete iha Sentru Saude Bairo Formasa, Dili ba jornalista Online Independente iha Sesta ne,e.
Tuir dadus Ministériu Saúde katak, inisiu hahú vasina iha loron 7 Abril too agora benefisiario hamutuk ona rihun 14 iha teritorio nasional, husi total vasina hamutuk dose rihun 24. Husi total ne’e Dili hetan dose rihun 13 no restante ba Munisipio sira.
Tuir kalkulasaun husi Ministériu Saúde vasina Astrazenaca ne’e sei hotu iha loron-tersa ou kuarta oin mai. Entretantu Governu mós hetan ona kontaktu ofisial husi Governu Australia sei apoia rihun 10 Vasina Astrazenaca.
Tuir planu, vasina AstraZeneca ne’e sei too Dili iha semana oin, tanba ne’e ba programa vasina daruak sei envolve mós husi populasaun sira.
Tuir Dra. Odete katak, vasina ne’e importante atu ema hotu tenke hetan, atu nune’e bele asegura ema nia imunidade hodi hasoru Covid-19 no moras sira seluk ne’ebé bele provoka isin.
“Tanba ne’e apela ba populasaun tomak hodi hakat ba Sentru Saude ne’ebe besik bainhira vasina ba faze daruak to’o maski laos obrigatorio,”dehan Odete.
Jornalista: Camilio de Sousa
Editor: Jose Sarito Amaral
