Portavoz Sentru Integradu Jestaun Krize (SIJK), Doutora Odete Viegas da Silva hatete, hahú husi loron 28 fulan-Maiu 2020 iha implementasaun Estadu Emerjensia datoluk to’o loron 8 fulan- Juñu ne’e ema na’in 27 tama illegal mai Timor Leste tantu sidadaun Timoroan nomós estranjeiru.

“Sidadaun sira ne’ebé illegal mai Timor-Leste ne’e liuhusi Batugade na’in 12, Suai na’in neen (6 ) no RAEOA na’in sia (9),” dehan nia liuhusi konferensia imprensa iha CCD, ohin.

Nia esplika, ema sira ne’ebé tama illegal husi Batugade ne’e sidadaun timoroan na’in 10 no sidadaun Indonezia na’in rua (2), husi Suai sidadaun timoroan na’in tolu (3) no sidadaun Indonezia na’in tolu (3), husi RAEOA sidadaun timoroan na’in walu (8) no Indonezia ida (1).

Tanba ne’e, sidadaun Indonezia sira ne’e deporta fila hotu no sidadaun timoroan sira ne’e prosesa tama kuarentena.

Nia husu ba komunidade sira ne’ebé ema besik fronteira hanesan iha Batugade, Suai no RAEOA atu kumpri nafatin protokolu husi Ministériu Saúde no Organizasaun Mundial Saúde (OMS).

Karik ema ruma tama illegal mai bele informa ba ekipa vizilansia hodi proses aba kuarentena.

Husu ba Komunidade sira tuur hakmatek iha fatin labele la’o ba mai hodi fó risku ba familia, komunidade no nasaun.