Tuir komunikadu ne’ebé Online INDEPENDENTE asesu, iha Pajina Ofisial, Francisco Guterres Lú Olo, relata, durante iha  HNGV Lú Olo hetan tratamentu médiku ida di’ak tebes, husi komponenti hotu ne’ebé hola papel importante iha area oioin hodi kontribui ba rekoperasaun Kamarada Lú Olo ne’ebe ho lais tebes.

Ho nune’e, Eis-Prezidente Republika Lú Olo ho nia familia agradese tebes ba esforsu sira,  atendementu di’ak no apoiu tomak, la sura kolen husi ekipa médiku espesialista, infermeiras, ekipa laboratorista, ekipa Radiolojia no ekipa emerjensia  ne’ebe fó ona asisténsia médiku ida kualidade, nune’e kontribui Dr. Lú Olo bele alta lalais,”haktuir komunikadu refere.

Entretantu, ba alta entidade sira hanesan Prezidente Republika José Ramos Horta, Primeiru Ministru Taur Matan Ruak, Prezidente Parlamentu Nasional Aniceto Guterres,  Chefe Estadu Maior F-FDTL Tenenti General Falur Rate Laek,  familia bo’ot husi Partidu FRETILIN, liuliu ba Sekretario Jeral FRETILIN Mari Alkatiri, ne’ebé halo vizita kuaze lorloron,  Veteranus, familia husi Ossu-Vikeke no Atauro no maluk sira seluk ne’ebe la temi naran Ida-idak.

“Ba imi tomak nia laran luak hola momentu balu halo  vizita,  no orasaun sira  mak fó  mós forsa no korajem ba Kamarada Lú Olo hodi rekopera lalais husi nia moras. Ba solidareidade hirak ne’e Prezidente Partidu Lú Olo dala ida tan hamutuk ho nia familia hato’o agradese wain tebes,”haktuir komunikadu refere.

Enkuantu, tuir informasaun, iha loron 22 fulan-Setembru tinan ne’e, Francisco Guterres sei ba halo tratamentu mediku iha Malázia.