Dezastre Naturais Janeiru-Fevereiru, Hamate Ema Na'n 14 Featured

By Agustino Santos Gama Marsu 02, 2022 339

DILI:Sekretaria Estadu Protesaun Sivil (SEPS) relata katak dezastre naturais ne’ebé akontese iha fulan-Janeiru to'o Fevereiru 2022, iha territoriu nasional hamate ema na’in 14.

Dezastre naturais ne’ebé mosu ne’e ho tipu, erozaun anin bo'ot, ahi han uma no inundasaun.

inundasaun iha Komoro 1

“Iha Baucau na’in 6 iha tinan foun ita-nian (2022), komunidade sira ba haris tasi mak mout na’in 5, na’in 1 hakur mota maka mate, iha Bobonaro na'in 4 hakur mota maka mate, iha Ermera na’in 1 ai maka monu kona, Manatutu na’in 1, Oe-Cusse na’in 2, no iha Baukau kanek na’in ida", dehan Sekretáriu Estadu Protesaun Sivil, Joaquin Gustamao, hafoin hato’o relatoriu ba Primeiru Ministru, iha residensial Farol dili, segunda ne'e (28/02).

Entretantu inundasaun udan no anin boot iha fulan-Fevereiru, nia afirma, iha domingu foin lalais ne'e nia parte evakua ona vitima afetadu sira ba sentru evakuasaun temporariu Dom Bosco hamutuk uma ka’in 80, membru família ema hamutuk 294.

"Agora komunidade sira ne'ebé iha Dom Bosco Comoro, ita kontinua servisu hamutuk ho Padre sira iha ne'ebá hodi matabisu han meudia to'o kalan", tenik nia.

SEPS kontinua fornese aihan matak ba Dom Bosco hodi tein fó han  ba vitima sira to’o sira  fila hikas ba ida-idak nia uma.

Inundasaun iha Komoro 3

 "Ohin ita halo fali asesmen ida sira bele fila ona ba sira-nia fatin ne'ebé maka hela ita lori fali sira ba dadus kona-ba asesmen uma ka’in sira ne'ebé hetan estragus liliu iha Dili, Postu-Administrativu Dom Aleixo no Postu Administrativu Cristo-Rei, família afeitadus hamutuk 128 no uma ne'ebé hetan estragus a'at totál hamutuk 4 no aat natón iha 3, a'at kaman iha 6", katak nia.

Entrentantu, SEPS iha ona planu atu halo koordenasaun ho Ministériu Administrasaun Estatál no mós Ministériu Solidariadade Sosiál hodi bele aselera fatin ba konstrusaun Sentru Multi Funsaun ne'ebé maka iha ona prosesu nia laran.

Inundasaun iha Komoro 4

Antes ne’e, familia afetadu hamutuk uma ka’in 80 hetan ona apoiu aihan no sasan seluk husi Governu liuhusi SEPS, no hetan mós apoiu husi UNDP, UNICEF no ajensia sira iha Dili.

Rate this item
(0 votes)

Independente Digital TV