“Ami too duni ba fatin hodi haree direita foti tiha amostra hodi ba halo analiza depois ita haree nia rezultadu”, dehan nia, iha Timor Plaza, horisehik.

Maski nune’e, analiza preleminaria husi ANPM nian bele mós antes ne’e ema soe óleu fo'er iha fatin ne’e, entaun ikus mai kee hetan fila-fali.

Tuir nia, sé ida ne’e mak loos entaun ba oin ne’e kuandu loron nia maran entaun ne’e la'ós, maibé nia kontinua mosu ne’e mak foin dehan buat ruma.

Tanba ne’e, iha laboratóriu mak sei hatudu katak ne’e nia natureza ka prosesadu, entaun ne’e gazoel mak ema ba fakar iha ne'ebá tanba horon nia iis gazoel de’it.

Nia Esplika, ANPM kontinua monitoriza nafatin hodi haree buat ne’e mina mak sai duni ka gás ou ema mak ba soe de’it iha ne'ebá.

Mina Matan Barak iha Kosta Sul

Entretantu, tuir peskiza ne’ebé ANPM halo identifika mina matan barak liu iha parte Kosta Súl nian hanesan Suai-Alembata, Same-Betanu, Manatutu-Laklubar-Sobada no parte oeste maka Bobonaru.

“Ita identifika lubuk ida parte kosta súl maibé la taka dalan mós iha mina matan seluk ne’ebé sei mosu tan ita nia estrutura fatuk sira hanesan ne’e”, dehan Prezidente ANPM.

Nia dehan, agora esplorasaun la’o hela tanba kompañia sira halo hela estudu kontratu rua iha parte súl. Tanba ne’e, fó oportunidade ba sira hodi halo peskiza no espera rezultadu la'o di’ak.

Aleinde ne’e, mós informa kona-ba folin mina sa’e ne’e haree ba merkadu tanba fulan kotuk mina barríl ida hetan $55 no agora besik $80 depende merkadu iha li'ur.