Deskonfia Hatama Ikan Ilegal, PNTL Kaptura Sidadaun Indonezia Na’in 2 Featured

By Domingos Gomes Maiu 31, 2023 408
Komandante (UPM), Superintendente Polisia, Eugenio Pereira. Foto:Media PNTL. Komandante (UPM), Superintendente Polisia, Eugenio Pereira. Foto:Media PNTL.

DILI: Polisia Nasional Timor-Leste(PNTL), kaptura sidadaun indonesia nain rua, deskonfia hatama ikan bokon illegal, hamutuk 1,2 tonelada ho 1.200 kilo grama husi Alor Indensia tama mai Teritoriu Timor-Leste.

Komandante (UPM), Superintendente Polisia, Eugenio Pereira hateten, sidadaun Indonesia nain rua  husi Alor Indonesia tula ikan Tama mai Timor-Leste, bainhira sira hetan insidente ró soke ahuruin to’o avaria iha dalan klaran, depois PNTL hetan halo kedas kapturasaun hodi halo indentifikasaun.

Nia dehan, sidadaun Indonesia nain rua ne’e ho ró Peska tula ikan tama mai TL, tanba hasoru difikuldade ro soke ahuruin to’o avaria mak sira atraka, iha area Ulmera, tanba ne’e sira la konsege to’o  iha UPM Nasional Dili hodi hatun ikan.

Nia hatuir, bainhira sira atraka ró Peska ne’e iha area Ulmera, PNTL Munisipiu Likisa haree sidadaun nain rua ne’e sira nia sidadania husi nasaun Indonesia, tanba ne’e sira kaptura kedas lori ba eskuadra Polisia Likisa halo indentifikasaun.

Nia informa, bainhira autoridade PNTL halo kapturasaun ba sidadaun Indonesia nain rua ne’e iha area Ulmera, postu Administrativu Bazartete, Munisipiu Likisa, iha prosesu indentifikasaun la iha indikasaun ba krime, tanba sira hetan lisansa husi kompaña ida iha Timor-Leste, hodi hatama ikan halo negosiu.

“Sidadaun nain rua ne’e ita kaptura tiha sira, lori ba iha eskuadra Polisia Munisipiu Likisa, ita identifika sira laiha indisiu ba krime, tanba sira hetan lisensa husi kompaña ne’ebé hetan kontratu ho sira halo negosiu hatama ikan mai Timor-Leste,” Dehan Eugenio ba Jornal INDEPENDENTE Viatelefone, Tersa (30/05).

Nia afirma, bainhira remata indentifikasaun hotu la iha indikasaun ba krime, kompaña ne’ebé resposavel ba sira hamata ikan mai Timor-Leste, kontinua hadia ró Peska ne’ebé avaria hodi kontinua transporta tama mai iha kuartel UPM Nasional Dili Lesidere.

“Kompaña ne’ebé fo lisensa autorizasaun negosiu ba sidadaun sira hatama ikan mai TL, ne’e iha dokumentu lisensa kompletu  pasaporte viajem sidadaun sira nian kompletu no parte ami UPM simu mos depaixu ida husi komandante jeral PNTL, dokumentu lisensa negosiu ikan ne’e, tanba sira ante ne’e haruka ona kart aba iha komandu jeral PNTL hodi husu autorizasaun  konaba selu taxa ba estadu Timor-Leste,” dehan nia.

Nia afirma, iha depaixu komandu jeral PNTL ne’e fo autorizasaun ba sidadaun kompaña atu halo aktividade negosiu, tanba husu UPM atu kordena  parte autoridade relevante sira hanesan Imigrasaun, UPM, Custom, Karantina, Saude  alimentar no komandu PNTL Munisipiu Dili rasik hodi bele haree atu halo inspeksaun ba sasan sira ne’ebé husi nasaun Indonesia tama mai Timor-Leste.

“Durante indentifikasaun hotu, ita halo kordenasaun ho autoridade relevante sira ita halo inspeksaun ba ikan sira ne’e ita haree dokumentu sira no kondisaun ikan  buat hotu lao tuir regra  laiha violasaun ita fo autorizasaun ba sira hahu ona  tama ikan ba kompaña ne’e atu halo negosiu sira kontinua lori ba faan iha merkadu,”  hakotu nia.

Entretantu Tuir Informasaun ne’ebé Jornal INDEPENDENTE Asesu iha loron 29/05, husi servisu sekreta katak, ekipa  Alfa simu Ordem servisu husi Xefi Operasaun Servisu Nasional Intelijensia (SNI), komandu PNTL Munisipiu Likisa kaptura sidadaun indonesia nain rua  ho ró peska ida iha Area Ulmera,postu Administrativu Bazartete Munisipiu Likisa.

Bainhira simu ordem husi SNI, ekipa konjunta kompostu N2-Naval no ekipa Movel desloka kedas ba iha  fatin akontesimentu, komandu PNTL Munisipiu Likisa transporta ona sidadaun nain rua ba iha eskuadra Polisia Munisipiu Likisa hodi halo identifikasaun.

Iha prosesu indentifikasaun sidadaun timor oan ida ne’ebé halo servisu hanesan Broker ba iha kompañia ida naran Voanda Unipessoal.Lda, durante ne’e simu ikan husi nasaun indonesia.

Tuir kornolojia husi autor sira esplika katak, sidadaun indonesia nain rua tula ikan sai husi Alor-Indonesia iha tuku 12:00 kalan Oras Indonesia, hodi desloka mai kapital Dili, tanba tula ikan bokon ho kuantidade 1,2 tonelada hamutuk 1.200 Kg. No sira tama iha Dili iha tuku 02:00 madrugada otl.

Autor mos deklara katak,  tuir lolos ne’e ró ne’e tula ikan ne’e atu ba atraka ka para iha Unidade Maritima Polisia (UMP)-Nasional Dili iha area Lisidere, maibe sira nia ró avaria tanba soke ahuruin no estraga baling-Baling ne’e maka sira ba atraka ka para fali iha area  Ulmera Munisipiu Likisa nian.

Tuir Patraun ró no naran Inisial KK informa katak, sira tula ikan  hatama ba Kompañia ne'e kuaze dala lima (5) to’o ne’en (6) ona no kada fulan sira sempre hatama ikan bokon ba Kompañia Voanda Unipessoal.Lda ho kuantidade bo’ot liu maka 1,5 tonelada no ki'ik liu 1,0 tonelada.

Nune’e mos kariawan no naran inisial I, hanesan anak buah kapal (abk) deklara katak, nia tama mai Timor Leste desde Timor ukun-an.

Nia informa, katak antes ne'e nia ho ró seluk hatama mos sasan hanesan, ikan maran, ikan bokon, mina rai no gasoel mai Timor Leste,iha iha tinan 2007, ho nia maluk sira ba hatun sasan iha Munisipiu Baucau konsege hetan kapturasaun husi Komandu PNTL Munisipiu Baucau hodi detein iha sela  kumpri oras 72 nia laran.

Hafoin rona tiha deklarasaun husi sidadaun indonesia nain rua ne’ebe transporta ikan tama mai Timir-Leste, ekipa PNTL kontinua rona nain ba kompaña Voanda Unipessoal.Lda no naran inisial JB deklara katak, bai-bain sira sobu duni ikan iha Unidade Polisia Maritima nia fatin iha area Lisidere Dili no  sira sempre informa ba Autoridade Kompetente hanesan; Imigrasaun, UPM, Custom, Karantina, Saude no komandu PNTL Munisipiu Dili rasik,  maibe kondisaun ró avaria iha kalan boot sira atraka ka para ró iha area Ulmera Likisa mak PNTL konsege kaptura tiha sidadaun nain rua, depois sira informa kedas ba UPM hodi hare assuntu ne'e.

Bainhira ekipa PNTL rona no rekolla hotu informasaun sira halo analiza katak iha indikasaun ne’ebé forte, tanba ró refere tuir lolos ne’e para iha UPM Lisidere Dili, maibe ba atraka para fali iha area Ulmera fatin ba sidadaun sira ne’ebé utiliza ba halo rekreasi nian.

“Ekipa konjunta detekta katak, ró ne’ebé tula ikan tama mai Timor-Leste seidauk halo inspeksaun husi autoridade relevante sira, maibe sidadaun sira selu uluk ona taxa, signifika sidadaun sira selu taxa baseia ba informasaun verbal deit, tanba sasan balun, deskonfia sidadaun halo manifulasaun  bele hatun antes no transporta fali ba ró ki'ik sira seluk ita labele identifika, tanba sira tama iha tempu kalan bo'ot,” dehan Pesoal lakohi publika naran ba Jornal INDEPENDENTE, (29/05).

Tanba ne’e ekipa konjunta rekomenda ba  exekutivu atu toma nota ba servisu migrasaun no Unidade Polisia Maritima tanba deskonfia sira  involve no hetan lukru husi aktividade ne’e sidadaun sira selu taxa ba estadu la tuir despaixu ne’ebé autoridade sira atribui.

“Sidadaun nain rua dadaun ne’e  ita kontinua transporta ona ba iha komandu PNTL Munisipiu Dili hodi asegura hodi sumbete ba prosesu investigasaun,” hakotu nia

Rate this item
(0 votes)
Last modified on Kuarta, 31 Maiu 2023 14:57

Independente Digital TV

Tuir ami iha Twitter

Kalendariu Notisia

« May 2024 »
Mon Tue Wed Thu Fri Sat Sun
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31