Deskansa Iha Hakmatek Rohan Laek Saudozo Dom Basílio, Adeus!!! Featured

By Julia da Costa Novembru 04, 2021 918
Soldadu Militar lori sai Amu Bispo Dom Basilio nia mate isin husi Igreja Katedral Sao Jose Baukau hodi sarani sira fo omenajen ikus. Foto Kontribuidor. Soldadu Militar lori sai Amu Bispo Dom Basilio nia mate isin husi Igreja Katedral Sao Jose Baukau hodi sarani sira fo omenajen ikus. Foto Kontribuidor.

BAUKAU:Bispo Dioseze Baukau, Dom Basílio do Nascimento, kuarta ohin (4/11), tuku 2:00ort lorokraik, haloot ona fatin ikus liu iha Igreja Katedral Santo Antonio Baukau.

Tuir observasaun Online Independente iha prosesu funebre, molok haloot mate isin Dom Basílio iha Igreja laran, sarani sira hotu ne’ebé asiste direitamente hakneak no foti-sa’e lensu-mutin hodi husu perdaun no omenajen ikus no hateten, “Adeus Dom Basílio, Adeus Dom Basílio no Adeus Dom Basílio”.  

Bainhira atu hatun mate isin ba rai kuak, lia-na’in husi Munisipiu Aileu hamulak hanesan parte lisan husi Dom Basílio nia identidade kultura nian.

Iha seremónia fúnebre ne’e, partisipa husi Primeiru Ministru, Taur Matan Ruak, Presidente Parlamentu Nasional, Xefe Estado Maior Jeneral F-FDTL, Tenente Jenerál lere Anan Timur, Xefe Casa Sivil no Militar Presidente Repúblika, Prokuradór Jerál Repúblika, Komisariu KAK, lider partidu politiku sira, lideransa komunitaria, reprejentante Komunidade Musulmanu no sarani sira.

Fatin Haloot Bispo Dom Basílio

Fatin haloot Dom Basílio iha Igreja Katedral Santo Antonio Baukau laran, parte rai-kuak ho nia medida luan sentímetru 82, naruk metru 2,25 no nia altura ka kle’an sentímetru 160.

Rai kuak ne’e foru mós hena ne’ebé reprezenta símbolu tolu. Símbolu dahuluk iha parte ulun ho ain nian foru hena ne’ebé ninia kór Bandeira Repúblika Demokrátika Timor-Leste, husi sorin-sorin foru ho hena ho nia kór bandeira Vatikanu no iha parte rai, fatin hatuur kaixaun, nahe ho tais nu’udar símbolu reprezenta kultura ka lisaun Timor nian.

Símbolu tolu-ne’e ho ida-idak nia sentidu, hanesan bandeira RDTL hatudu katak Estadu Timor-Leste nia rekoñesimentu ba Dom Basílio nia kontribuisaun ba Timor-Leste nia luta independénsia no kontinua kontribui iha ukun rasik an to’o hakotu-iis (eroi), símbolu bandeira Vatikanu reprezenta Dom Basílio mós pertensia ba família-boot Vatikanu no símbolu tais ne’ebé nahe ne’e hatudu katak Dom Basílio Timor-oan ne’ebé mai hosi lisan-ida.  

Ho ida ne’e Amu Bispo nia jornada ikus nian ho sarani katoliku Timor-Leste to’o ona rohan iha mundu ne’e.

Dom Basílio nia mate husik hela triste no matan-been ba sarani tomak iha Timor-Leste liliu Dioseze Baucau.

Biografia Badak

Amu Bispu Dom Basilio moris iha Suai, Munisipiu Kovalima iha 14 Juñu 1950, hahú simu knar nu’udar Amu Lulik iha 25 Juñu 1977.

Hafoin tinan 20 hala’o nia misaun nu’udar Amu Lulik, iha 6 Janeiru 1997, Amu Papa João Paulo II, hili nia hodi sai Amu Bispu, no iha 19 Marsu 1997 bainhira Amu Papa forma Dioseze Baukau, Dom Basilio hetan fiar hodi lidera Dioseze refere.

Bainhira Amu Bispu Dom Carlos Filipe Ximenes Belo rezigna iha 26 Novembru 2002, Dom Basilio hetan fiar hodi sai Bispu Dioseze Dili molok troka husi Amu Bispu Dom Alberto Ricardo da Silva.

Hafoin hala’o nia misaun durante tinan 24 (1997-2021), iha 30 Outubru 2021 notisia triste falun Timor-oan tomak nia fuan.

Amu Basilio hetan atakasaun fuan iha Suai iha 29 Outubru kalan. Iha 30 Outubru transporta husi Suai mai Hospital Nasionál Guido Valadares (HNGV) hodi halo tratamentu, maibé esforsu ne’ebé profisional saúde sira halo la konsege salva Amu Basilio nia vida.

“Amu atakasaun kardiovaskolar ka atakasaun fuan, nia mós uluk opera fuan akompaña ho tensaun,” informa Diretór Jerál Klinika HNGV, Marcelino Coreia iha mortuariu HNGV, Sabadu (30/10).

Rate this item
(0 votes)
Last modified on Tersa, 09 Novembru 2021 11:14

Independente Digital TV