“Kriminaliza difamasaun konteúdu ne’e saida? Tanba audiénsia direitu sidadaun hotu ninian, hanesan mós artigu 40 no 41 Konstituisaun, direitu atu rona lia loos,” dehan Deputadu Adérito Hugo da Costa, iha PN, horisehik.

Nia hatutan, ho teknolojia ne’ebé avansadu tenke buka atu diskute, la’ós imediatamente foti desizaun hodi kriminaliza lei difamasaun.

“Ha'u rasik uluk jornalista… ami faz parte movimentu ho sosiedade sivíl no média sira hotu para mobiliza opiniaun públiku katak país ne’e ninia finalidade ukun-aan husi prinsípiu universál ba direitu umanu, liberdade imprensa, liberdade espresaun tenke garantidu,” tenik Hugo.

Maski nune’e, agora Governu iha inisiativa ida liuhusi ministériu justisa hakarak propoin kontráriu, maibé hein katak entidade hotu-hotu sei haree mós ba ba definisaun ba Estadu direitu demokrátiku ninia pratika iha setór hotu-hotu, liuliu iha dezenvolvimentu setór média ninian.