Defisiensia Matan Na’in 34 hetan Formasaun Iha AHDMTL Featured

By Husi : Camilio de Sousa Fevereiru 01, 2021 794
Diretor Ezekutivu AHDMTL, Gaspar Afonso Diretor Ezekutivu AHDMTL, Gaspar Afonso

DILI: Ema ho Defisiensia Matan na’in 34 hetan ona formsaun iha Asosiasaun Halibur Defisiensia Matan Iha Timor-Leste (AHDMTL)

Diretór Ezekutivo Assosiasaun Halibur Defisiensia Matan Timor-Leste (AHDMTL), Gaspar Afonso informa, Defisiensia Matan na’in 34 hetan formasaun iha Assosiasaun Halibur Defisiensia Matan Timor- Leste  (AHDMTL).

Nia esplika,  AHDMTL harí iha loron 01 fulan  Jullu  2011 ho objetivo Ida atu hare, tau matan no  luta ba Ema ho Defisiensia Matan nia direitu  iha Timor-Leste liu-liu ba labarik Mane no  Feto Sira.

Tuir rejultadu peskizasaun ne’ebé AHMDTL rekolla husi 2011 to’o agora, total Ema ho Defisiensia matan iha teritoriu laran tomak hamutuk na’in 14.828, kompara ho Ema ho Defisiensia Sira seluk.

Tanba ne’e ho esforsu ne’ebé AHDMTL halo iha tinan kotuk, konsege ba Munisipiu 13 hodi buka tuir Defisiensia matan sira iha foho no agora AHMDTL  rekolla  ona Ema ho Defisiensia matan hamutuk 245 hodi mai tuir treinamento Kapasitasaun oin-oin  iha Dili. Maibé husi numeru Ema ho Defisiensia matan na’in 245 ne’e sei mai ho faziadamente.

“ Iha tinan ida ne’e AHDMTL lori uluk na’in 60 ne’ebé agora dadaun hela ona iha asrama AHDMTL nian, enkuantu husi na’in 60 ne’e, na’in 34 mak agora dadaun tuir hela formasaun, oinsa bele hatene lee no hakerek,”dehan nia iha knar fatin, Manleuana, ba jornalista Online INDEPENDENTE ohin.

Nia hatutan, husi Ema ho Defisiensia Matan na’in 34 ne’e, kompostu husi feto 21 no Mane 13, enkuantu  na’in 14 finaliza ona eskola konkorente nivel 5 no hein kontinuasaun  ba nivel 6.

Nia relata, esforsu tomak ne’ebé AHMDTL halo ba nia menbru sira mak, konsege lori Ema ho Defisiensia Matan na’in 4 bele ba eskola iha UNTL liu-hosi rezime espesial ne’ebé antes Assosiasaun Defisiensia Timor Leste (ADTL) halo ona kordenasaun hodi servisu hamutuk ho Universidade Nasional Timor Lorosa’e  (UNTL).

Nia informa, Kandidatu AHMDTL na’in 4 ne’ebé tuir ona rezime espesial hodi estudo iha UNTL sira foti Fakuldade Siensia Politika iha Departemento Institutu Komunikasaun sosial (ICS) nian.

Nia akresenta, Programa prinsipal lima ne’ebé durante ne’e AHDMTL halo mak hanesan,  Pesikiza, Treinamento, Advokasia, promósaun Inkluzaun Sosial no negosio ba koperativa.

Husi vizaun hirak ne’e AHMDTL hamósu tan sentru ida ho naran Masas no Unidade Rua hanesan Artezenato no Muzika,.

“Programa hirak ne’e nia benefisiario sira Mak Ema ho Defisiensia matan sira ne’ebé ita akumula iha AHDMTL Ida ne’e, nune’e Programa hotu- hotu ne’ebé Ema ho Defisiensia AHMDTL,”nia dehan.

AHMDTL mós rekomenda ba Komisaun Funsaun Publiku karik loke vaga ruma, nia kriteria labele bandu Ema ho Defisiensia oin -oin atu tuir teste ruma.

“Ami husu no rekomenda ba Funsaun Publiku se bele premite Ema ho Defisiensia bele  konkore vaga ruma, tanba Ema ho Defisiensia hotu nia fiziku mak ladun normal, maibé ninia pensamento hanoin sei natoon hodi kontribui ba dezenvolvimento nasional,  no  Ami triste tanba bainhira Ministerio ruma loke vaga nia kriteria mak tenke Ema ho saudavel, bahasa Indonesia Karik Sehat dan Jasmani Ida ne’e  hamate ona ami nia vontade atu ba tuir teste ruma,” nia informa.

AHDMTL mós fó Agradese ba Institusaun governo nian hanesan Ministerio Solidaridade Sosial no Inklusaun (MSSI), Sekretaria Estadu Igualidade no Inkluzaun (SEII) no Agensia Internasional sira hanesan USAID, UNDP, Plan Internasional, Embaixada Portugal, Unicef no Agensia sira seluk ne’ebé  sempre fo apoiu finanseiro hodi hala’o programa  sira  durante husi tinan  2011 to’o .

Rate this item
(0 votes)

Independente Digital TV