Dadus 16 Abril: TL Aumenta Positivu COVID-19 Na’in 18 Featured

By Jacinto Xavier Abril 16, 2020 3438
Coronavirus Coronavirus

DILI: Sala Situasaun Sentru Intergradu Jestaun Krize (SIJK), informa katak kazu konfirmadu ba Corona Virus (COVID-19), iha Timor-Leste sa’e ona ba ema na’in 18.

Tuir Portavoz SIJK, Odete da Silva Viegas hatete, dadús COVID-19 iha Timor-Leste ba loron ohin nian, ema sira ne’ebé iha konfinamentu obrigatoriu hamutuk na’in 567. Pasa ka liu ona loron 14 iha kuarentena hamutuk na’in 1339.

Kazu atuál COVID-19 ba loron ohin (16/4) suspeitu hamutuk 229, provavel iha na’in haat, negativu 195, hein rezultadu na’in 12, no konfirmadu positivu aumenta na’in 10.

“Ita ohin loron iha ona kazu konfirmadu hamutuk na’in 18, ba loron ohin nian ita aumenta kazu foun 10,” dehan nia, liu husi Konferensia Impresa, iha CCD, ohin.

Odete dehan, kazu konfirmadu na’in 18, na’in ida rekoperadu. Enkuantu na’in 17 iha hela fatin izolamentu Sentru Saúde Vera Crus Dili.

Abitante sira ne’ebé positivu kontinua ho kondisaun estavel, mediku no espesialista sira oras ne’e kontinua akompana hela sira.

Tuir dadus ne’ebé Sala Situasaun Sentru Integradu Jestaun Krize (SIJK), fó sai katak timor-oan hahú afeitadu positivu ba kazu surtu COVID-19, iha loron 10 fulan-Abril 2020.

Timor-oan ne’ebé afeitadu ne’e tama iha grupu ida husi kupang, Indonesia mai fronteira-Batugade, no kontinua halo viazen mai Dili ho bis Maliana, iha loron 1 fulan-Abril 2020.

Timor-oan sira ne’e kuerentina iha Hotel Katuas hamutuk na’in 37.

Iha loron 12 fulan-Abril, estudante timor-oan na’in rua tan afeitadu positivu COVID-19. Loron tuir mai fali iha loron 13 fulan-Abril, aumenta tan na’in rua, no loron kuarta horsehik (15/4) aumenta tan na’in rua, no loron kinta ohin (16/4) aumenta tan na’in 10, maka total timor-oan ne’ebé konfirmadu positivu COVID-19 hamutuk 17.

Enkuantu, molok timor-oan sira ne’e afeitadu, iha mos ema estranjeiru ida konfirmadu positivu, maibé nia rekooperadu.

Total kazu konfirmadu positivu iha Timor-Leste hamutuk na’in 18, na’in ida rekooperadu, no

na’in 17 ne’e agora iha fatin izolamentu Sentru Saúde Vera Crus Dili.

Husu nafatin ba sidadaun hotu iha Timor laran tomak atu kontinua kumpre regra ne’ebé maka Organizasaun Saúde Mundial (OMS), fó sai ona katak, tenke fase liman bei-beik ho sabaun, kumpre distansia sosial no fiziku.

Tuir dadus Organizasaun Mundial Saúde (OMS) agora dadadun kazu Covid-19 mundial ne’e hamutuk 2.000.243 ema na’in 126.758 maka mate ona.

Nasaun Estadu Unidus Amerika (USA) maka kazu konfirmadu sei aas hamutuk 614.246 iha kazu foun 360. Total ema ne’ebé mate hamutuk 26.064.

Rate this item
(0 votes)

Independente Digital TV