Sábadu, 23 Outubru 2021 | Login
Virus Covid-19.Foto:Google. Virus Covid-19.Foto:Google.

Covid-19, Kazu Foun 57, Mane 34 No Feto 23 Featured

DILI:Sala Situasaun Sentru Integradu Jestaun Krize (SIJK), relata ohin loron 21 fulan-abril tinan 2021, ekipa konjunta saúde deteta tan kazu foun na’in 57, iha mane na’in 34 no feto na’in 23.

Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araujo hatete, totál kazu konfirmadu kumulativu (sura husi 21 marsu 2020) hamutuk 1509, no kazu foun 57 ne’ebé relata ohin husi Dili na’in 53 no na’in 4 husi munisipiu seluk.

“Husi total kazu foun ohin iha nain 5 sintomatiku no na’in 52 asintomatiku ka la hatudu sintomas,”dehan nia liu husi komunikadu (21/04).

Ho nune’e husi total kazu detetadu foun ohin, 50 (87,7%) mak deteta liuhusi teste ho razaun atu halo viájen/ka halo ona viájen ba Munisípiu hafoin deteta pozitivu. Enkuantu sira  ne’ebé rezultadu teste pozitivu, sira-nia hela fatin iha Díli iha duni cluster sira ne’ebé iha kazu detetadu barak.

Entretantu dadus jeral ba loron ohin iha kazu foun na’in 57, kazu rekuperadu ohin iha na’in 33, no total kazu ativu ne’ebé baixa iha sala izolamentu aumenta ba 749.

Husi horiseik (20/04) mai ohin (21/04) teste PCR ne’ebé Laboratóriu Nasionál Saúde (LNS) halo hamutuk 832, detallu hanesan tuir mai, Vijilánsia sentinela na’in 42, Rastreiu ba kontaktu (Contact tracing) iha  32, Rastreiu Aleatoriu (Random Screening)iha 336, Viájen sai husi serka sanitária husi Dili iha  397 no Viájen internasionál hamutuk 25, Follow up iha kuarentena laiha.

SIJK relata, ohin loron 21 abril sala izolamentu Vera Cruz iha kazu detetadu na'in 13. Iha área obstetrisia na'in 3, medisina interna na'in 9 no pediatria 1.

Na'in 3 iha obstetrisia kategoria moderadu hotu. Nain rua tuur-ahi ona, na'in ida seluk sei hein. Sira-nia kondisaun estável.

Sira na'in 9 iha medisina interna, 4 grave, na'in 5 moderadu. Na'in 4 grave uza ventiladór, na'in 3 uza CPAP (Continuous Positive Airway Pressure).

Kazu 1 pediatria ne'e 5 meses ho boncopneumonia moderado, nia kondisaun estável.

Nune’e SIJK nafatin apelu ba populasaun iha Timor-Leste laran tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras Covid-19 da’et bá mai.

No keta haluha halo tuir regras sira hanesan, uza maskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta malu lapresiza kaer liman, bensa-liman, rei-malu ka hakuak malu, evita halibur malu barak, hamriik ka tuur dook husi ema seluk mínimu metru ida ho balun.

 

Jornalista:Saturnina da Costa

Editor:Jose Sarito Amaral

Read 792 times
Rate this item
(0 votes)