Sexta, 25 Juñu 2021 | Login
Estrada ne'ebe estragus husi inundasaun iha loron 4 fulan-abril tinan 2021. Foto: Independente. Estrada ne'ebe estragus husi inundasaun iha loron 4 fulan-abril tinan 2021. Foto: Independente.

CNA Realiza Ona Prosesu Konkursu Aprovizionamentu Projetu 107 Featured

DILI:Ministériu Finansas liu-husi Komisaun Nasional Aprovizionamentu (CNA, sigla Portugés), hahú husi fulan-janeiru tinan 2020 to’o iha loron 7 fulan-maiu tinan 2021, realiza ona prosesu konkursu aprovizionamentu projetu hamutuk 107 ho totál orsamentu $565.446.270,37.

Projetu-sira ne’e maioria ninia prosesu aprovizionamentu hahú ona no balun iha ona faze finál aprovizionamentu nian, nune’e tuir kalendáriu sei konklui iha tinan ne’e nia laran.  

Fontes finansiamentu orsamentu ba projetu pakote 107 ne’e mai husi fontes tolu hanesan, Fundu Infraestrutura ho montante $328.387.809,65,  Fundu La’ós Infraestrutura $21.058.460,72 no  Imprestimu husi Ajénsia Internasionál, Banku Dezenvolvementu Aziátiku (ADB), Banku Mundiál no Ajénsia Kooperasaun Internasionál Japaun (JICA) ho montante $216.000.000.

Projetu pakote 107 ne’e nia modalidade konkursu mak hanesan tuir-mai ne’e, Konkursu Internasionál (ICB, sigla Inglés) iha pakote 13, Konkursu Nasional (NCB, sigla Inglés) ba servisu fornesimentu bens no konstrusaun estrada nasionál no rural, iha pakote 62, Konkursu Restritu (RT) iha pakote 23 no Konkursu Servisu Konsultadoria (RFP, sigla Inglés) iha pakote 9.

Husi pakote 107 ne’e, iha modalidade ba aprovizionamentu barak liu mak Konstrusaun Sivíl ne’ebé nia objetivu atu konstrui infraestrutura prinsipál sira hanesan, estrada nasionál, ponte, konstrusaun no estensaun ba Aeroportu Internasionál Prezidente Nikolau Lobato nomós kontinuasaun ba rehabilitasaun no manutensaun ba estrada rurál iha munisípiu sira hanesan Lautem, Baucau, Kovalima, Manatuto, Vikeke, Manufahi, Ainaro, Ermera, Bobonaro no Likisa.

Aleinde ne’e, iha mós modalidade Servisu Konsultadoria ba dezeña konstrusaun foun sira no supervizaun ba servisu konstrusaun sivíl. Modalidade seluk ne’ebé importante mós hanesan, servisus akizisaun no fornesimentu Bens no Servisu hanesan fornesimentu no instalasaun sistema kabu submarinu iha parte sul Timor-Leste, protesaun barreira mota sira, protesaun torre eletrisidade ne’ebé ninia pakote balun kompletu no atu tama ona iha faze implementasaun.

Ho implementasaun projetu hirak ne’e bele fó benefísiu ba dezenvolvementu nasionál no kontribui hasa’e kresimentu ekonomia iha rai laran inklui kriasaun empregu ba Timoroan sira.

Hafoin Prezidente Repúblika Francisco Guterres “Lú-Olo” promulga Lei OJE Refitikativu 2021 no públika iha Jornal da Repúblika semana kotuk, ekipa tékniku husi Ministériu Finansas hahú halo ajustamentu Orsamentu Retifikativu iha sistema Dalan Ba Futuru Timor-Leste (DBTL) no DGT.

Servisu ajustamentu ne’e kompleta ona iha kinta-feira semana kotuk no daudaun ne’e sistema online fila-fali ona.

Iha tinan-2021, Ministériu Finansas haruka ona pedidu levantamentu osan husi Fundu Petróleu ba Banku Sentrál Timor-Leste ho montante totál $350.000.000. Levantamentu dahuluk iha fevereiru 2021 ho montante $200.000.000, no levantamentu daruak iha 28 abril 2021 ho montante $150.000.000.

Atu hetan informasaun detalla kona-ba Regras no Prosedimentu Aprovizionamentu nom ós oportunidade ba konkursu-sira, bele vizita portál CNA nian www.cna.gov.tl.

 

Asistente Editor: Saturnina da Costa

Read 231 times Last modified on Tersa, 11 Maiu 2021 13:26
Rate this item
(0 votes)