Prezidente CCI-TL, Jorge Serrano, hateten, asina akordu ho emprezaria Austrália nia para loke parseria ba futuru, parseria ne'e atu fo formasaun ba emprezaria sira no mós trabalhador Timor oan sira.

"Tanba ita país foun, país ki'ik, ita presiza koopera mós ho país sira seluk, purtantu Austrália país ida ne'ebé ita-nia vizinu i ha'u ko'alia ennome Camara Comercio, ita-nia ligasaun ho Camara Comercio Austrália ho organizasaun emprezáriu Austrália ita tenke hamrik halo di'ak, ne'e mak hanoin primeira ves estabelese MoU ida-ne'e atu reforsa parseria ba organizasaun emprezarial rua ne'e Timor-Leste Austrália, no mós buka atu fo formasaun ba ita-nia ema emprezaria sira, trabalhador sira," dehan Jorge Serrano, iha CCD, Sesta (08/08).

Nia hatutan, iha asina akordu ne'e mós, sai matadalan ida ba Timor oan sira bainhira atu ba servisu iha Austrália.

"Akordu ida-ne'e mós loron ruma hanoin katak atu hasai trabalhador sira ba li'ur mós ita iha meius ruma atu komunika ho empreza sira iha li'ur, maibé atu ba servisu ida aprende", nia hatutan.

Nia adianta, parseria ida-ne'e atu loke dalan ba emprezaria sira, organizasaun rua ne'e la halo negósiu, loke de'it dalan atu reforsa setór privadu parte rua ne'e nia kontaktu nia parseria no mós atu promove mós  Timor oan sira ne'ebé hakarak ba servisu iha li'ur atu servisu aprende para aban bainrua fila fali mai bele monta sira-nia empreza sira-nia atividade ekonómiku iha rai laran

"Iha kamara komérsiu ne'e objetivu prinsipál mak ne'e. Iha akordu ne'e mós hakarak lori Timor oan sira ba li'ur servisu aprende atu mai serbisu iha ita-nia rai loke bussines loke negósiu iha ita-nia rai", tenik.