Diretór Operasional Manutensaun iha BTL,EP Aleixo do Santos hatete, problema bee moos la’ós akontese deit iha fatin balun maibé akontese iha fatin hotu, tan ne’e BTL,EP halo hela sistema melloramentu ba iha kanu distribuisaun no transmisaun balun ne'ebé atu bele fornese bee ne’ebé diak ba komunidade sira, liu-liu iha área sira ne’ebé sai alvu ba alargamentu estrada.

Nia dehan, iha área Lurumata, BTL,EP instala ona tanki bee ida iha aldeia refere hanesan temporaria, atu bele fasilita komunidade sira asesu ba bee moos.

Maibé, Nia afirma, iha área Lurumata nian, BTL, EP hein hela, bainhira prosesu rehabilitasaun estrada remata, maka BTL,EP bele hadia sistema melloramentu sira ne’e, atu bele distribui bee moos ho diak ba komunidade afeitadu sira.

“Iha Lurumata ne'e, ami fornese ona tanki ida no halo kordenasaun ho autoridade komunitaria, liu-liu xefe suku, xefe aldeia sira tau tanki ne'ebá para sira assesu hanesan temporariamente, molok hadia sistema sira hotu, kuandu melora iha tempu ida ne'ebé agora dadauk ne'e, entaun sei nafatin impaktu, tanba estrada sei la'o hela no loke fali drainajen, entaun kanu sira ne'ebé fornese bee ba iha komunidade sira liu-liu iha área eviksaun sira ne'e baibain ami tenke tau iha drainajen nia sorin,”dehan nia ba Jornalista Online INDEPENDENTE, foin lalais ne’e.

Diretór Operasional ne’e hatutan, ba preokupasaun komunidade aldeia 03 Lurumata ho 05 kona ba falta bee moos, tanba tanki ida ne’ebé instala iha aldeia refere la sufisiente, nune’e, BTL,EP sei halo koordenasaun ho autoridade lokal atu ne’e bele aumenta tan tanki bee iha aldeia rua refere.

“Konforme, sei kordena tanba foin tau mak iha parte ida iha aldeia 03 no mós ami sei hare kuandu iha nesesidade BTL, EP sei aumenta fali, konforme pedidu mai husi komunidade sira atu nune'e oinsa para ita bele tau iha sentru sira para komunidade sira bele kuru, atu nune’e pelu menus sira bele uza durante tempu hadia estrada ne'e. Tamba ita iha kordenasaun hamutuk ho xefe suku, xefe aldeia, entaun ita presiza bairo-bairu sira ne’ebé maka presiza atu ita bele fornese bee, tanba ita lakoi akontese iha fatin balun ita haruka tanki ba hanesan problema entre komunidade ho komunidade fali, entaun ita presiza servisu hamutuk ho ita nia Xefe Suku sira,”hakotu Diretór ne’e.