Kada tinan iha tempu bailoron, komunidade sira iha suku Builale hahú laran susar, tanba bee-moos ne’ebé sulin to’o besik sira-nia uma iha tempu udan hahú ‘maran’. Sira tenke la’o ho distansia kilometru rua to’o kilometru lima hodi bele kurun bee-moos.

Kondisaun ne’ebé hanesan mós mosu ba Postu Saude iha suku refere, ne’ebé hahú hala’o operasaun iha tinan 2022.

Kanalizasaun bee-moos ba Postu Saude foun ne’ebé paradu tanba debitu bee ne’ebé tuun, aumenta tan ho kanu kuak tanba ferujen no hetan estragus husi komunidade balun, halo profisional saude sira iha Postu Saude Builale hasoru difikuldade atu halo atendimentu ba pasiente sira.

Kondisaun ne’ebé at liu mosu bainhira pesoal saude sira simu inan isin-rua ne’ebé hakarak atu partus. Tanba bee laiha atu fase raan, fó hariis ba bebé no seluk tan, nune’e pesoal saude sira haruka inan isin-rua fila hodi partus iha idaidak nia uma.

Enfermeiru destakadu iha Postu Saude Builale, Jacinto da Costa Guterres informa, durante ne’e bee la sulin to’o iha postu saude nune’e afeita tebes ba asistensia husi mediku sira ba pasiente, liu-liu ba inan sira ne’ebé atu partus.

"Bainhira bee-moos laiha ida ne'e prejudika ami-nia servisu atu atende inan isin-rua sira, dala-ruma mós ami haruka fali pasinte sira ba partus iha uma mak ami ba halo akompañamentu de’it,” informa Jacinto ba Jornalista Jornal INDEPENDENTE, iha nia knar-fatin, Domingu (29/10).

Komunidade ida, Anarofina da Costa Guterres ho idade tinan 24 afirma, problema bee halo pesoal saude sira iha postu saúde Builale haruka fila inan isin-rua sir aba partus iha uma.

"Ha'u-nia feto maluk sira isin-rua ba atu partus iha postu Saúde Builale ne'e tanba bee laiha sira haruka fila ba partus iha uma mak parteira sira tuir ba fó asistensia," dehan Anarofina.