Avizu ba Okupante espasu públiku: Sobu rasik molok Notifikasaun tuun Featured

By Graça de Carvalho Maiu 13, 2024 4215
Sekretràriu Estadu Asunto Toponomia no Organizasaun Urbana, Germano Santa Brites. Foto:INDEPENDENTE. Sekretràriu Estadu Asunto Toponomia no Organizasaun Urbana, Germano Santa Brites. Foto:INDEPENDENTE.

DILI: Sekretràriu Estadu Asunto Toponomia no Organizasaun Urbana husu ba komunidade sira ne’ebé mak okupa espasu públiku atu sobu rasik sira-nia fatin molok notifikasaun tuun.

Avizu ne’e Sekretràriu Estadu Asunto Toponomia no Organizasaun Urbana, Germano Santa Brites, hasai bainhira halo dialogu ho komunidade no autoridade suku Bairo-Pite.

Sekretràriu Estadu husu ba autoridade sira iha suku Bairo-Pite atu fó avizu ona ba kamunidade ne'ebé okupa espasu publiku, liu-liu iha area Ailok Laran, Bairo-Pite no Perumnas, atu sobu rasik sira-nia uma.

“Sira ne'ebé mak halo baraka, kios ka uma taka valeta leten, halo favor sobu rasik, muda rasik sasan molok hatun notifikasaun.”

"Antes ha’u hatun notifikasaun di’ak liu koopera, rona ona informasaun lalika ezije tan notifikasaun. Se notifikasaun ne'e tuun, ba ita la koalia ba malu ona, kuando to'o nia tempu notifikasaun ne'e remata signifika katak SEATOU ho ekipa halo servisu de’it," dehan Germano iha Aldeia Frekat, Bairo-Pite, Sesta (10/05).

Germano dehan, valeta ne’e labele uza sai fatin negosiu ka hela fatin, tenke loke luan nune’e bee bele lao tuir nia hodi evita inundasaun.

“Kuandu mosu inundasaun, mosu iha fatin ruma, makina bele tama par hasai rai ho foer sira iha valeta laran, tanba ne'e ita fó avizu hotu ona," nia dehan

Iha fatin hanesan Xefe Suku Bairo-Pite, Joaninha Alves Soares, daudauk ne’e nia parte sei halo hela identifikasaun ba komunidade sira ne’ebé okupa espasu públiku.

"Ami seidauk hatete loloos katak uma hira mak ami atu indetifika tanba ami foin simu daudaun informasaun husi SEATOU katak, husi jardin ne'ebé mak agora uza ona espasu publiku ne'e atu bele hola ona sira-nia eleitora par atu hatene loloos katak komunidade hira mak destaka iha jardin nia laran," nia dehan.

Nia fiar katak, iha semana oin sira bele hetan ona rezultadu komunidade hira mak uza ka okupa jardin iha suku Bairo-Pite.

"Iha semana ida ne’e no semana oin bele hetan rezultadu total komunidade hira mak utiliza jardin suku Bairo-Pite," dehan nia.

Iha fatin seluk, negosiante ida Deometro Gomes Marçal hatete, nia okupa area jardin desde tinan 1999.

Maske nune’e, nia dehan, nia parte prontu koopera maibé bainhira hasai sira husi fatin ne’ebá tenke muda ba merkadu ne’ebé ho kondisaun di’ak.

"Fó tempu limitadu ami sees, ami prontu atu sees maibé kuitadu ami ida nu’udar povu, ami ida nu’udar negosiante, ami-nia oan eskola, balun universidade, ami halerik ami osan laiha maibé lori buat sira ne'e (negosiu) mak ami hodi suporta," dehan nia.

Negosiante seluk, Celestina Dias Ximenes reforsa, foin dauduk ekipa Jestaun Merkadu aviza ona hodi fó tempu loron tolu ba sira atu sai.

"Mais estadu seidauk fó fatin dignu ida ba ami. Ami prontu koopera katak ami sai duni no ami hakruk ba estadu maibé tenke fó fatin ba ami atu hodi faan," dehan nia.

Rate this item
(0 votes)

Independente Digital TV

Tuir ami iha Twitter

Kalendariu Notisia

« June 2024 »
Mon Tue Wed Thu Fri Sat Sun
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30