Arão Hana'ok Esperiénsia Husi Aniceto Guterres Featured

By Aquino Gomes Maiu 08, 2020 2776
Presidente Parlamentu Nasional. Presidente Parlamentu Nasional.

DILI: Esperiénsia Prezidente Parlamentu Nasionál IV Lejizlatura, Aniceto Guterres ‘hanorin’ Prezidente PN atuál, Arão Noé hodi fó resposta ba pedidu destituisaun ne’ebé hatama husi Bankada FRETILIN, PLP no KHUNTO.

Tanba ne’e , Arão Noé sei estuda hela pedidu destituisaun hafoin fó resposta ofisialmente ba deputadu sira husi bankada parlamentár tolu ne’e.

Pedidu ida uluk tama iha Janeiru ba destituisaun ba Prezidente IV Lejizlatura to’o fim mandatu eleisaun antesipada 2018 nem ajenda, ne’e hatudu la buat ida, Prezidente mós la sala.

“Pedidu ida uluk 2017 to’o 2018 iha IV Lejizlatura laiha plenária, laiha ema ida kestiona. Tanbasá mak ida-ne’e kestiona? Ne’e laiha viola buat ida, Prezidente diak hela. Iha reuniaun lider bankada deside katak durante Covid-19 ne’e kuandu iha ajenda orden-du-dia mak iha plenária. See laiha ajenda orden-du-dia laiha plenária,” dehan nia, iha Parlamentu Nasionál, horisehik.

Prezidente Parlamentu Nasionál sei justifika pontu lubuk ida ne’ebé rekerente sira koloka iha rekerimentu ba destituisaun nian.

“Kona-ba ajendamentu ba rekerimentu destituisaun ne’e ha’u sei haree lai ninia konteúdu depois bele hatete ajenda ka lae. Pedidu ida uluk tama iha Janeiru ba destituisaun Prezidente IV Lejizlatura to’o fim do mandatu 2018 nem (la) ajenda, ne’e hatudu katak la viola buat ida,” dehan Arão.

Kona-ba deklarasaun Bankada FRETILIN, PLP, no KHUNTO katak atu boikota Parlamentu Nasionál, nia dehan, laiha hanoin la halo ne’e.

Arão mós informa, loloos iha ona ajenda ba reuniaun lider bankada tuir data merkadu, maibé tanba rekerimentu destituisaun nian maka husu adia tiha reuniaun lider Bankada ba tempu tuir kuandu fó ona responde ba asuntu ne’e.

Entretantu, Vise-Prezidente Bankada FRETILIN, Francisco Miranda Branco hateten, situasaun la hanesan ho situasaun iha uluk.

“Situasaun ne’e situasaun ne’ebé ita haree husi média CNRT hakarak realiza intuisaun ne’e atu kria krize institusionál hodi nune’e aprezenta Prezidente Repúblika atu dekreta eleisaun antesipada. Oin seluk ho 2017,” dehan nia.

Vise-Prezidente Bankada PLP, Francisco Vasconcelos hateten, iha tinan 2017 ne’e foin hahú VII Governu katak programa kuandu xumba automatikamente laiha ona kontinuasaun tenke ba eleisaun antesipada.

Nia dehan, uluk depois rezultadu eleisaun forma VII Governu programa mai la pasa iha PN, CNRT duni mak orienta la pasa, entaun kuandu programa Governu la pasa, signifika ajenda laiha, prepara ba eleisaun antesipada.

“Maibé agora laiha programa iha hela VIII Governu la’o hela, sira iha laran hotu xumba orsamentu fila-fali mai dehan atu ba eleisaun antesipada,” dehan nia.

Rate this item
(0 votes)

Independente Digital TV