Tersa, 07 Dezembru 2021 | Login
Angela. Angela.

Angela Buka Fali Estratejia Foun Featured

DILI: Hafoin Xefe Estadu Maior Falintil Forsa Defeza Timor-Leste (F-FDTL) Lere Anan Timur fó liberdade atu kontinua hakilar, portavoz grupu RNDJ-KTDTL Angela Freitas deklara, sei konsolida malu hodi define estratejia foun atu bele kontinua lori karta petisaun ba Prezidente Repúblika, inklui Organizasaun Nasaun Unidus (ONU) iha Nova Iorke.

“Ida ne’e komitmentu ida, kuandu ita defende ba buat ida lia loos ne’e nunka iha rezerva, ita tenke kontinua nafatin hodi hatudu mós ba mundu internasional katak ita-nia pais ne’e demokratiku no ita tenke kumpri regras konstituais ne’ebé iha,” dehan Angela iha Sede RNDJ-KTDTL, Bairo Formoza, Kuarta (09/09).

Kona-ba estratejia foun atu hatama petisaun, Angela hatete, kudaru prinsipal RNDJ-KTDTL sei tuur hamutuk hodi deside, tanba sei haree mós ba situasaun politika ne’ebé lao hela, atu nune’e labele prejudika ba situasaun seluk.

“Ita tenke haree mós ba iha situasaun politika atual iha rai laran, ita mós agora daudauk iha hela estadu emerjensia nia laran, ita mós lakohi par atu prejudika fali ema barak tanba asaun ne’e rasik.”

“Opsaun ne’ebé ita iha mak ita sei hatama petisaun ne’e ba iha Prezidente Republika no ida ita sei haruka ba iha Nova Yorke, ba iha Nasoens Unidas, par internasionalmente sira bele sintoniza nafatin situasaun demokratiku iha rai ne’e,” dehan nia.

Nia hatutan, razaun seluk hato’o petisaun ba ONU atu nune’e politikamente sira bele hatene katak nasaun demokratiku tenke iha demokrasia ida ne’ebé justu ba ema hotu.

Iha oportunidade ne’e, Angela hatete mós katak, to’o ohin loron nia seidauk sente hakmatek tanba F-FDTL sei kontinua halo vizilansia iha Bairo Formoza.

“Agora ita koalia daudauk sira (F-FDTL) liu daudauk hela,” dehan nia.

Maske nune’e, Angela dehan, presaun ne’ebé F-FDTL fó sei la prezudika nia vontade hanesan sidadaun atu kontinua nafatin lao ba oin hodi defende justisa no lia loos.

Iha oportunidade ne’e, Angela mós husu ba F-FDTL atu bele halao nia knar tuir Konstituisaun RDTL artigu 146.

Angela mós preokupa intervensaun deputadu sira bazeia ba sutar kaleng, la’os bazeia ba realidade ne’ebé iha.

“Ohin loron to’o ba iha debate husi Parlamentu kona-ba surat kaleng, nusa mak sira la konsentra kona-ba sira-nia knar no nusa mak sira la deteta, diagnosa ba pronlema sira ne’ebé mak ohin loron povu sira hasoru atu nune’e sira bele fó prioridade ba seitor sira ne’ebé mak bele fó benefisiu direita ba povu nia moris?.”

“Ida ne’e mak importante, tanba nu’udar pais demokratiku ita tenke respeita liberdade ba kada sidadaun sira atu espresa sira-nia vontade,” dehan nia.

Read 1228 times
Rate this item
(0 votes)