Alkatiri Rekoñese Diferensa Ideia ho Xanana Featured

By Jacinto Xavier Agostu 01, 2019 7999
Alkatiri ho Xanana. Foto INDEPENDENTE Alkatiri ho Xanana. Foto INDEPENDENTE

OEKUSI: Prezidente Autoridade Rejiaun Administrativu Espesiál Oekusi Ambenu (RAEOA), Mari Alkatiri, rekoñese iha diferensa ideia ho Negosiadór Prinsipál ba Delimitasaun Fronteira Marítima, Kay Rala Xanana Gusmão, iha kontestu dezenvolvimentu nasionál.

Prezidente Autoridade RAEOA, Mari Alkatiri hateten, antes ne’e partidu liu husi Comite Central FRETILIN (CCF), fó ona konfiansa atu halo diálogu ho lider nasionál, ne'e duni iha tempu badak sei hahú hasoru malu. Foin lalais ne’e komisaun justisa no pás mai hasoru malu ona ho Prezidente RAEOA ho asuntu ida kona-ba atu buka dalan hodi tuur hamutuk ho lider na’in lima.

“Ha'u husu ba sira imi hasoru ona maun Xanana ka seidauk, maibé sira hataan katak dehan hasoru uluk ona ho Xanana, entaun ha'u dehan ne’e di'ak. Ha'u konfirmandu kedas katak dia 3 Agostu ha’u sei partisipa iha (diálogu), iha Sentru Konvensaun Dili (SKD),” dehan nia, iha knaar fatin, Pante-Makasar.

Alkatiri hateten, maski komisaun ne'e halo ona esforsu, maibé fiar katak Xanana sei la partisipa, tanba dehan nia (Xanana) iha ajenda barak.

Alkatiri hateten, lider na'in haat seluk hanesan Lu Olo, Taur Matan Ruak, durante ne'e laiha problema, José Ramos Horta mak ohin ko'alia aban ko'alia fali seluk, maibé laiha problema.

“Ha'u ho Xanana rasik mós durante ne'e la iha problema, ami na'in rua so iha de'it diferente ideia iha prosesu dezenvolvimentu nasionál, ne’e normál”, tenik nia.

Alkatiri hatutan, diferensa ideia ne’e normál iha prosesu dezenvolvimentu nasionál, atu bele haree ba prosesu hotu-hotu hodi buat ne'ebé la di’ak bele hadi'a atu aselera di'ak liután dezenvolvimentu ba povu.

“Ha'u dehan beibeik ona ami rua Xanana sei moris la halo buat ruma ba nasaun ne’e, ami rua mate, ha'u la hatene atu ba infernu mós ha'u la hatene”, dehan nia.

Oras ne’e daudaun ema sira ne'ebé uluk lakohi ukun aan mak ohin loron besik loos ona maun Xanana hodi halo buat oioin, maibé hanesan lider nasionál ba mai di'ak hela tanba laiha problema.

Rate this item
(1 Vote)

Independente Digital TV