Komisariu Ezekutivu Servisu Kooperativu EDTL,EP, Júlio de Jesus Gonçalves esplika katak problema ahi mate-lakan ne’ebé akontese durante ne’e la sees husi fator prinsipal rua. Fator tekniku baibain relasiona ho manutensaun liña, reabilitasaun liña, no mós troka ekipamentu balun.
“Iha kondisaun tekniku hakarak ka lakohi ita tenke hamate ahi ne'e durante oras rua ka oras tolu, kestaun ne’e tenke ita avizu,” dehan Julio ba Jornal INDEPENDENTE, iha nia knar-fatin, Kaikoli, Segunda (19/01).
Enkuantu ba fator natureza hanesan udan ka anin boot ne’ebé halo ai balun tohar no estraga fiu halo ahi mate derrepente.
“Ita nunka espera udan boot, anin boot mai baku ai ruma tohar tiha hanehan fiu, ahi mate derepente,ita labele avizu,” dehan nia.
Maske nune’e, EDTL sempre fó avizu ba liu husi ninia pajina ofisial kona-ba ahi mate, tantu kestaun tekniku no natureza.
Prepara mini-subentasaun iha Ermera
Atu bele hamenus problema ahi mate-lakan, EDTL, EP. planeia hodi harii mini-subestasaun eletrisidade iha Gleno, Munisipiu Ermera. Planu ne’e diskuti iha sorumutu entre Prezidente Komisaun Ezekutivu EDTL, EP. ho Autoridade Munisipiu Ermera.
Prezidente Autoridade Munisipiu Ermera (PAM),José Martinho dos Santos Soares hatete katak, konstrusaun sentru distribuisaun eletrisidade ne’e ho objetivu atu Ermera la depende liña eletrisidade husi Dili no Aileu.
"Konstrui ona Sentru Distribuisaun ne'e bele rezolve ona ahi mate-lakan iha Munisípiu Ermera, tanbá liña eletrisidade ne'e la depende ona ba iha liña seluk,” dehan nia.
PAM ne’e sujere atu mini-subestasaun ne’e harii iha Fatukero, tanbá fatin ne’e dook uitoan husi sidade no la fó impaktu direita ba area rezidensial sira.
Prezidente Komisaun Ezekutivu EDTL EP,Paulo da Silva afirma kompromisu atu realiza konstrusaun refere iha tempu besik.
"Ita husu autorizasaun ba PAM hodi oferese rai mamuk ho autorizasaun ho minimu 50×100 hodi halo konstrusaun mini-subestasaun refere," dehan Paulo.
Eletrisidade iha Lautem seidauk 100%
Enkuantu, problema asesu ba eletrisidade kontiua sai preokupasaun iha Munisipiu Lautem.
Membru Parlamentu Nasionál husi Partidu Demokratiku (PD), Armando dos Santos Lopes hatete katak sei iha aldeia barak mak seidauk asesu eletrisidade.
Tuir nia, maske TL ukun an dekada rua ona, kuaze aldeia 180 iha teritoriu TL, inklui aldeia hitu iha Lautem, seidauk asesu eletrisidade.
Tuir nia, implementasaun planu estratejiku 2011-2030 periodu governasaun hirak sai kauza prinsipál ida ba atrazu iha distribuisaun eletrisidade.
Ahi mate-lakan estraga sasan elektroniku
Aleinde limitasaun asesu, ahi mate-lakan prezudika komunidade sira. Deputadu PD ne’e destaka komunidade nia sasan eletroniku barak mak hetan estragus tanba ahi ne’ebé mate-lakan derrepente.
“Povu sosa enerjia eletrisidade, la’os free, kada sosa pulsa taxa mós lao hela. Ha’u fó ezemplu de’it purvolta $10 dollar kuandu ita sosa pulsa bele koa $2 dollar,” dehan nia.
Kestaun hanesan hato’o husi Depuatdu Bankada Fretilin, David Dias Ximenes ‘Mandati’.
“Ohin mós maluk sira ko’alia kona-ba buat ida eletrisidade lakan-mate.Horseik, Domingune’e mate dala tolu kedas.Mate ne’e mós eskejitu derrepente lakan fali, AC mós aat hotu.Agora kuandu hanesan ne’e ita atu husu ba see karik,” nia kestiona.
