Tuir planu Ministeriu Saúde sei halo primeita lansamentu iha iha Sentru Saúde Formosa no sei partisipa husi Primeiru Ministru, Taur Matan Ruak,
Ministra Saúde Odete Maria Viegas hatete, vasinasaun ne’e universal no ema ne’ebé hela iha Timor-Leste iha direitu atu hetan vasinasaun hodi prevene Covid-19 ne’e.
“Aban sei halo lansamentu nasional ba vasinasaun ou imunizasaun husi Covid-19, no ema se deit iha Timor-leste, inklui ema estranjeiru sira ne’e mós sei hetan vasinasaun gratuita,” dehan nia iha Parlamentu Nasional,(06/04).
Nia hatutan, aimoruk ba vasinasaun ne’e iha ona no prioridade ema ne’ebé simu vasina uluk mak hanesan, servisu liña frente sira.
Tuir informasaun ne’ebé Online Independente asesu, kona ba vasinasaun ne’e katak, Primeiru Ministru rasik mak sei simu vasina dahuluk.
Molok ne’e, Fundu Nasaun Unida ba Infánsia (UNICEF) liu husi COVAX facility AstraZenaca doses rihun 24 mai to’o iha Timor-Leste iha loron 5 fulan-abril tinan 2021.