5 Marsu Eleisaun ba Komisariu KAK • Rui sei tau prioridade ba prevensaun Featured

By Ekipa INDEPENDENTE Marsu 02, 2024 2678
Kandidatu ba Komisariu KAK. Foto:Dok. Kandidatu ba Komisariu KAK. Foto:Dok.

DILI: Bankada Parlamentar liu husi ninia reuniaun deside hodi ajenda eleisaun ba Komisariu Komisaun Anti Korrupsaun. Tuir ajenda, eleisaun ne’e sei realiza iha 5 Marsu ne’e.

Sekretaria Meza Parlamentu Nasional Interina, Maria Tereza Gusmão informa, iha 29 Fevereiru, horseik, iha reuaniun lider bankada ne'ebé lidera husi Vise Prezidente PN, Terezina Viegas, deside ona ajenda ba eleisaun Komisariu KAK.

"Ami ohin iha reuniaun ne'e deside ona katak iha dia 5 Marsu, semana oin, Parlementu sei halo eleisaun ba Komisariu KAK, ne'ebé tau ona iha ajenda," dehan Maria ba jornalista sira, iha Parlamentu Nasional, Kinta (29/02).

Tuir nia, desizaun ba ajendamentu ne’e mosu tanba bankada boot rua, CNRT no Fretilin, iha ona konsensu politiku kona-ba kandidatu Komisariu KAK.

Iha fatin, hanesan, Vise Prezidente Bankada Fretilin, Maria Angelica Rangel informa, tanba Xefe Bankada sira sei iha rai li’ur, Vise Xefe Bankada sira mak halo reuniaun hodi deskuti kona-ba ajenda sira ne’ebé iha, inklui mós eleisaun ba Komisariu KAK.

"Kona-ba KAK, nia regras mak lori ba deskuti tiha iha lideres bankada, depois fila fali mai bankada sira sei runiaun, depois mak hola desizaun kona-ba ajenda ba elisaun KAK nian, ne'ebé tuir ajenda dia 5 semana oin,” dehan nia.

Kona-ba konsensu, deputada ne’e rekuza katak bankada CNRT ho Fretilin iha ona konsensu.

“Konsensu ami seidauk iha, nune'e ha'u sei lori fali ba iha reuniaun Bankada (Fretilin) nian, depois mak ami sei aprezenta," katak nia.

Prevensaun no Altera Lei KAK

Entretantu, kandidatu uniku ba Komisariu KAK, Rui Pereira dos Santos deklara, bainhira hetan fiar husi Parlamentu Nasionál atu lidera KAK, nia sei tau prioridade ba asuntu prevensaun no mós alterasaun ba lei KAK.

“Ha’u espera katak Parlamentu fó konfiansa (ba ha’u) nu’udar Komisariu Komisaun Anti Korupsaun. Ha’u sei tau prioridade ba asuntu prevensaun, tanba lori ema ba sulan iha prizaun, haan hemu gratis ne’e despeza boot. Ha’u-nia programa prioridade mak tenke prevensaun,” dehan nia iha Gabinete Vise Ministru Estatal, Kinta (29/02).

Prioridade daruak, nia dehan, sei halo alterasaun ba lei KAK, liu-liu ba deklarasaun rikusoin.

Kona-ba preokupasaun husi deputadu balun ba funsaun ne’ebé Rui asume daudauk, kandidatu Komisariu KAK ne’e dehan, tuir Lei bainhira nia asume kargu nu’udar Komisariu KAK, nia tenke husik knar sira seluk.

Rui daudauk ne’e asume kargu nu’udar asesor iha Ministériu Administrasaun Estatal, hala’o knar nu’udar advogadu privadu, no sai mós nu’udar juri ba rekrutamentu juiz.

Rate this item
(1 Vote)

Independente Digital TV