30 Jullu: Kazu Foun Covid-19 Feto 23 ho Mane 26

By Saturnina da Costa Jullu 30, 2021 337
Planu Vasina Kontra Covid-19. Planu Vasina Kontra Covid-19.

DILI: Sala Situasaun Sentru Inregradu Jestaun Krize (SIJK) relata ohin (30/07), ekipa konjunta saúde deteta tan kazu foun hamutuk na’in 49, kompostu husi Munisipiu Ermera 13, Dili 27, Baucau 2, Vikeke 2, RAEOA 2, Covalima 2 no Bobonaro 1.

Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo hatete, kazu detetadu foun ohin iha porporsaun kazu sintomatiku hamutuk pursentu 18,4 (18,4%).

Nune’e, pasiente rekuperadu loron ohin hamutuk na’in 46 no kazu ativu iha Sala Izolamentu hamutuk 870.

Enkuantu, komulativu kazu konfirmadu sura husi loron 21 fulan-Marsu tinan 2020 to’o loron 30 fulan-Jullu 2021 hamutuk 10,744.

Husi horiseik (29/07) mai ohin teste PCR ne'ebé Laboratóriu Nasionál Saúde halo iha Dili hamutuk 437 ho detallu hanesan, Vijilansia sentinela 7, Contact tracing 16, Random Screening 33, Viájen sai husi serka sanitária husi Dili 334, Viájen internasionál 5 no Follow up iha kuarentena hamutuk 42.

Totál testes PCR ne’ebé halo horiseik (29/07) iha Munisipiu sira seluk, RAEOA no HNGV hamutuk 259 ho detalle hanesan, Baucau 35, Ermera 8, Maliana 9, Maubisse 30, RAEOA 21, Suai 55, Vikeke 33 no HNGV 68.

Totál doze vasina ne’ebé fó ona ba populasaun elijível (tinan 18 ba leten), iha teritoriu laran tomak, to’o ohin (30/07) dader oras 10:00 hamutuk doze dahuluk iha 285,149 (37,7 %) no doze daruak iha 95,636 (12,6 %).

Enkuantu, evolusaun surtu Covid-19 iha Munisipiu Ermera durante semana ida ikus ne’e nia laran, númeru kazu pozitivu hahú aumenta maka’as iha loron 24 fulan-Jullu 2021, bainhira relata 36 kazu iha loron ida deit.

Nune’e, ekipa saúde halo rastreiu kontaktu (contact tracing) hahú iha loron 26 fulan-Jullu, deteta kazu kazu pozitivu 18 ne’ebé relata iha 27 fulan-Jullu, no ohin (30/07) relata kazu pozitivu hamutuk 123. Ekipa saúde servisu hamutuk ho autoridade administrativa no autoridade komunitária sira nafatin halo rastreiu kontaktu.

Munisipiu Ermera ninia kobertura vasina, to’o ohin dader tuku 10h00: doze dahuluk iha pursentu 12,7 (12,7%) no doze daruak iha pursentu 1,41 (1,41%). Kobertura ida ne’e, maka ki’ik-liu ona entre munisipiu sira hotu iha Timor-Leste nia laran tomak.

Entretantu, iha izolamentu Vera Crus ohin halo tratamentu ba kazu detetadu hamutuk 15.

 

Asistente Editor: Saturnina da Costa

Rate this item
(0 votes)

Independente Digital TV