“Ohin (26/02) kazu detetadu foun iha na’in 13, kazu rekuperadu na’in 127 no kazu mate ida,”dehan nia iha komunikadu neebé Online INDEPENDENTE asesu, sabado nee.
Ho nunee, kazu ativu neebé dadauk nee iha sala izolamentu hamutuk na’in 579 no komulativu kazu konfirmadu to’o 26 fevereiru 2022 hamutuk 22.649.
Ba kazu mate, Ministeriu Saúde relata, mane ho idade 38, simu ona vasina AstraZeneca kompletu, tranferensia husi husi Munisípiu Aileu bá HNGV, iha 20 fevereiru 2022, hala'o teste PCR no komfirmadu pozitivu Covid-19 ho CT 28,3. Transfere bá izolamentu Lahane iha 26 fevereiru 2022.
“Matebian hakotu iis, ohin iha tuku 04:23 madrugada, matebian hakotu iis ho diagnóstiku finál: Bronkoaspirasaun, Chriptoccocos Meningitis, Covid-19,”haktuir komunikadu refere.
Enkuantu, komulativu kazu konfirmadu óbitu hamutuk 128.
Entretantu, Ministeriu Saúde mós haktuir, munisípiu rua (2) laiha ona kazu ativu, enkuantu, munisípiu 9 ho RAEOA sei iha kazu esporádiku no Kapitál Díli ho Transmisaun Komunitária.
Aleinde, kobertura vasina kompletu (doze 2) iha Timor-Leste tomak, foin atinji 71,8%.
