Prezidente Instituto para a Defesa dos Direitos da Criança, Institutu Públiku (INDDICA,IP), Dinorah Granadeiro informa, iha Orsamentu Jeral Estadu ba tinan 2026, INDDICA sei preve rihun $15 hodi apoiu ba labarik sira ne’ebé faan sasan iha dalan-ninin.

Objetivu husi orsamentu ne’e, nia dehan, atu ajuda familia sira hodi prevene labarik sira labele faan sasan iha dalan-ninin, tanba labarik sira tenke ba eskola no estuda, la’os ba fa’an sasan.

“Ita-nia negósiu regulár hanesan monta kios ki’ik sira iha uma nune’e labele haruka labarik sira ba fa’an sasan iha dalan, tanba faan sasan iha estrada ne’e perigu ba labarik sira-nia vida,” dehan nia iha salaun Ministeriu Justisa, Sesta (26/09).

Orsamentu ne’e, nia hatete, INDDICA sei oferese $500 ba kada familia hodi suporta sira-nia negósiu.

"Ami-nia apoiu la'ós ba labarik sira hotu, maibé konsidera nesesidade labarik sira nian no família sira ne'ebé presiza duni tulun governu nian."

Tuir dadus inisiu, iha labarik 300 mak faan sasan iha dalan-ninin, maibé hafoin halo avaliasaun, to’o iha fulan Jullu 2025, iha de’it labarik na’in 50.

Sei lori PAN ba KM

Iha tempu badak, INDDICA sei lori Planu Asaun Nasional (PAN) ba Konsellu Ministru atu bele hetan aprovasaun.

Dinorah informa, INDDICA halo revizaun daruak ba PAN. Iha revizaun ne’e muda mekanismu ne’ebé uluk halo de’it konsultasaun iha nivel nasional no Munisipiu, no ladun kobre ba setor hotu-hotu.

Ho revizaun ne’e, nia dehan, se bele kobre nivel no setor hotu-hotu.

“Ita foin lansamentu survei online hotu, ho informasaun sira ne'e hotu atu nune'e bele lori ba Konsellu Ministru iha fulan Novembru nia laran atu bele hetan aprovasaun ba Planu Asaun Nasional,” dehan nia.