Mediku Jeral Fatin Seguru Formoza, Lucia da Silva Guterres informa, maioria vitima mai tanba kazu violensia ne’ebé provoka husi problema ekonomia.

"Hahú husi Janeiru to'o agora ami simu kazu hamutuk 170. Kazu sira ne'e la'ós de'it violénsia seksuál de'it, maibé agresaun fiziku mak barak, hanesan violénsia domestika depois violasun psikolojia ho ekonomiku," dehan Lucia ba Jornalista sira, hafoin partisipa Semináriu Nasionál ba kazu VBJ, iha Timor Plaza, Kinta (20/11).

Lucia esplika, vitima ne’ebé sira atende laos de’it ba feto adultu, maibé mós labarik feto no mane sira.

Bainhira halo tratamentu, nia dehan, nia parte fó forsa no buka maneira oinsa atu ko'alia ho sira nune’e sira bele fó sai sira-nia problema, tanba dala-ruma sira mai ho trauma no balun tauk atu konta sai problema.

“Tanba sira-nia parseiru intima mak halo rasik ba sira laos ema seluk, entaun sira mai ho kondisaun balun kanek, ami trata uluk lai kanek, depois mak ami bele asegura sira ho di'ak durante 24 oras. Sira la brani ko'alia sai, sira toba iha ne'ebá, ami prepara hahan ruma, sira deskansa, sente di'ak atu konta sai, sira bele konta sai," nia dehan.

Lucia konta, iha mós vitima balun ne’ebé mai iha kalan boot, liu-liu inan ne’ebé lori sira-nia bebé.

“Dala ruma akontese iha tuku rua no tuku tolu. Dala-ruma ita deskansa maibé sira dere odamatan ami tenke atende nafatin sira,” dehan nia.

Hafoin halo atendimentu, pesoál saúde sira husu ba vitima sira hakarak fila ba uma ka ba fatin seguru.

“Tanba dala-ruma balun fila ba uma la seguru, entaun ami tenke fó sira ba uma mahon hodi ba hela iha ne'ebá,” Lucia esplika.

Maske nune’e, nia dehan, ba uma mahon, sira so simu de’it mak iha Dili laran.

Maioria husi vitima ho idade tinan 20 ba leten ne'ebé harii ona familia. Problema ekonomia konsidera nu’udar kauza prinsipal ne’ebé hamosu violensia.