Tuir Diretór Diresaun Nasionál Empregu Exteriór Filomeno Soares hateten, mobilizasaun traballadór ba servisu iha Australia tuir planu ne’ebé Sekretária Estadu Formasaun Formasaun Profisionál no Empregu liu-husi Diresaun Nasionál Empregu Exteriór planeia kada tinan haruka joven Timor-oan ba hetán servisu iha Australia hamutuk 1.500 to’o 2000.
“Maibé iha tinan 2022 SEFOPE liu-husi DNEE konsege haruka joven Timor-oan hamutuk 3.514,”dehan nia iha salaun Maubara Room, Timor-Plaza, sesta (20/01).
Nia dehan, haree ba númeru traballadór Timor-oan ne’ebé Sekretária Estadu Formasaun Formasaun Profisionál no Empregu liu-husi Diresaun Nasionál Empregu Exteriór haruka ba servisu iha nasaun Australia liu tarjetu ne’ebé iha, tanbá ne’e iha tinan 2023 SEFOPE liu-husi DNEE iha planu sei haruka joven Timor-oan na’in 8000 ba servisu iha Australia.
Aleinde, nia dehan, iha tinan 2022, total joven Timor-oan ne’ebé servisiu iha Korea Súl hamutuk na’in 1.160.
Tan ne’e, tuir planu iha tinan ida ne’e sei haruka tan joven na’in 1.500 ba servisu iha Korea Súl.
Enkuantu, tinan ida ne’e mós SEFOPE sei haruka tan joven na’in 50 ba Japaun sai hanesan pilotu.
