Tuir komunikadu ne'ebé Online INDEPENDENTE asesu katak, ofisiál seniór sira husi Timor-Leste no Indonézia sei involve iha diskusaun estruturadu, ho objetivu atu delimita Fronteira Marítima permanente ida entre nasaun rua ne’e.
"Negosiasaun marítima formál akontese hafoin tinan lubuk ida husi diálogu informál, enkontru esploratóriu no troka informasaun téknika sira," dehan Komunikadu ne'ebé Online ne’e sita iha Pájina ofisiál Primeiru-Ministru Kay Rala Xanana Gusmão (18/08).
Nune’e, Governu Timor-Leste kontinua komprometidu ba rezolusaun pasífika ba nia Fronteira Marítima sira tuir Lei Internasionál no Konvensaun Nasoens Unidas kona-ba Direitu Tasi nian (UNCLOS, sigla Inglés).
Ronda negosiasaun Fronteira Marítima ne’ebé sei mai subliña dedikasaun kompartida hosi Timor-Leste no Indonézia atu mantein estabilidade rejionál, kaer metin Lei Internasionál no haburas relasaun viziñu ne’ebé di’ak.
Timor-Leste fahe Fronteira Marítima ho Austrália no Indonézia. Iha Marsu 2018 Timor-Leste no Austrália asina akordu ida iha Nasoins Unidas iha Nova Iorke ne’ebé halo delimitasaun bá sira-nia Fronteira Marítima.
Enkuantu, akordu ne'e hetan liu-husi prosesu Konsiliasaun obrigatóriu UNCLOS nian. Negosiasaun Fronteira Marítima ho susesu ho Indonézia sei permite Timor-Leste atu kompleta nia soberania marítima no direitu soberania, ne’ebé importante tebes ba governasaun efetiva, konservasaun tasi, jestaun rekursu no seguransa nasionál Timor-Leste nian.
