Ministru Negosiu Estrajeiru no Kooperasaun (MNEK), Dionisio Babo hatete, vizita Prezidente Repúblika (PR), Francisco Guterres Lú Olo nian ba iha Indonézia ne’e mós deskute mós kona-ba Fronteira Marítima no mós ko’alia kona-ba paraderu Saudozu Nicolau Lobatu ninia.

Ministru Dionisio nu’udar ministru ida ne’ebé akompaña vizita PR Lu Olo iha Indonézia durante loron rua.

Ministru ne’e hatete, kona-ba fronteira marítima no fronteira terestre nasaun rua ne’e hanoin katak importante atu deskute no rezolve.

MNEK hatutan, iha enkontru entre PR Lú Olo ho Jokowi temi mós saudozo Nicolau Lobato.

“Maibé ida ne’e hanesan follow up de’it saida mak uluk Prezidente Taur Matan Ruak, (no) Prezidente Ramos Horta iha altura ne’ebá sira ba ko’alia tiha ona”, dehan Dionisio liu husi konferensia imprensa iha iha Aeroportu Internasional Nicolau Lobatu Dili, Sábadu (30/06).

Maske koalia ona asuntu ne’e, maibé ministru ne’e hatete, presiza tempu atu identifika hafoin bele hetan rezultadu ne’ebé di’ak.

“Sira fó hela estetmentu, Indonézia ha’u hanoin presiza tempu atu identifika, haree depois ita hetan rezultadu ida ne’ebé di’ak liu,” katak nia.