SERVE Simu Ona Proposta Fabrika Jeep no Elikoptru Featured

By Pedro Alves Marsu 08, 2019 5455
Diretór SERVE, Florencio Sanches. FOTO: dok Diretór SERVE, Florencio Sanches. FOTO: dok

DILI: Servisu Rejistu no Verifikasaun Emprezariál (SERVE) simu ona informasaun husi kompaña internasionál balun ne’ebé hakarak atu halo investimentu iha fabrika Jeep no Elikoptru.

Molok ne’e, parte SERVE informa ona katak ekipa boot ida husi kompaña ne’ebé seidauk temi nia naran sei mai iha Timor Leste iha fulan Marsu ne’e nia laran.

“Iha fulan Marsu nia laran, ekipa ida sei mai hodi halo observasaun, husi vizita ne’e sira bele haree hodi investe,” afirma Diretór SERVE Florencio Sanches iha nia knar fatin, Tersa (05/03).

Diretór ne’e informa, iha Segunda (04/03) loraik, nia parte hetan kontaktu husi kompaña refere hodi afirma sira-nia interese atu investe.

“Horiseik (Segunda) tuku 17.00 lokraik sira komunika ona mai katak sira sei prosesa no konklui sira-nia dokumentus ofisial,” dehan Florencio.

Diretór ne’e dehan, iha kompaña rua mak sei mai halo investimentu. Kompaña ida investe ba Jeep no kompaña seluk ba Elikoptru.

“(Kompaña rua ne’e) husi nasaun rua, hola parte iha Asean, ne’ebé hanesan fundadór, haruka ona proposta ida ne’ebé laos ofisiál, hakarak investimentu,” katak nia.

Nune’e, Florencio dehan, nia parte sei hein karta ofisial husi kompaña sira hafoin aprezenta ba Konsellu Ministru.

Kona-ba kompaña nia naran, Florencio seidauk bele temi tanba tauk falla iha loron ikus. Maibé, nia hatete de’it, kompaña ne’e husi nasaun rua ne’ebé sai mós fundadór ba Asean.

Rate this item
(0 votes)
Last modified on Sexta, 08 Marsu 2019 16:19

Independente Digital TV