Koordenadór AIFESA, Abílio Oliveira Serilio dehan, AIFESA foin maka estabelese, hafoin simu podér foun hosi Inspesaun Alimentár Ekonomia (IAE).
Abílio dehan, iha fulan rua (Janeiru-Fevereiru 2017) nia laran sira seidauk halo fiskaliza saun, tanba sei hadi'a sistema servisu AIFESA.
“Loos duni iha preokupasaun husi mídia, komesa Janeiru too ohin loron inspesaun AIFESA la halo inspesaun ba iha supermerkadu tanba ami sei halo hela kontratu rekrutamentu ba funsionáriu ne’e mak too agora ne’e seidauk termina atu tun ba halo inspesaun,”dehan Abílio ba jornalista sira iha nia knaar fatin Kaikoli, Kinta (16/02).
Atu halo fiskalizasaun ba sasán liu prazu, AIFESA sei koordena ho liña Ministériu hanesan, MKIA, Ministériu Saúde, no MAP.
Tuir planu iha semana oin, AIFESE sei hala’o ninia servisu fiskalizasaun,hafoin Primeiru Ministru, Rui Maria de Araújo fó pose ba sira.
AIFESA rekruta ona sira nia funsionáriu hamutuk ema na’in 46 maka sei simu pose sai nu’udar Funsionáriu Públiku atu halo servisu kontrolu sasán liu prazu.
“Ba funsionariu sira ne’e mak AIFESA rekruta sira iha ona esperiénsia maski seidauk simu pose, maibé ha’u hanesan koordenadór haruka sira tun uluk bai ha tereinu hodi halo inspesaun urjente kuandu iha preokupasaun ruma husi públiku,” Abílio esplika.
AIFESA sai hanesan ajénsia importante ida ne’ebé governu kria atu sai matan no tilun ba governu kontrola sasán sira ne’ebé supermerkadu sira fa’an.
