PUDD: Remodela Governu Antes PR Desizaun OJE Featured

By : Jacinto Xavier Janeiru 16, 2019 6707
Prezidente Bankada Partidu Unidade Dezenvolvimentu Demokrátiku (PUDD), António de Sá Benevides Prezidente Bankada Partidu Unidade Dezenvolvimentu Demokrátiku (PUDD), António de Sá Benevides

DILI: Garante ezekusaun Orsamentu Jerál Estadu (OJE) tinan fiskál 2019 la’o ho susesu presiza estrutura governu ne’ebé kualidade no kualifikadu. Ne’e duni, antes Xefe Estadu foti desizaun ba OJE presiza halo remodelasaun ba estrutura governu rasik.

 

Prezidente Bankada Partidu Unidade Dezenvolvimentu Demokrátiku (PUDD), António de Sá Benevides hateten, sira iha esperansa boot ba Presidente Repúblika PR atu promulgasaun ba OJE 2019.

Maski nune’e, presiza mós halo avaliasaun servisu ba membru Governu iha OJE 2018 nian hodi hatene dezempeñu membru governu sira nian.

Ami nia observasaun própriu katak membru governu balun laiha duni kapasidade, tanba ne’e presiza halo remodelasaun”, dehan nia, iha Uma Fukun PN, horisehik.

Membru governu balun iha duni limitasaun koñesimentu, ne’e duni ezije Xefe Governu atu halo remodelasaun maibé ne’e kompeténsia ba Primeiru Ministru no Prezidente Repúblika atu diskute prosesu hirak ne’e.

Lideransa PUDD ne’e mós lakohi espesifika ba membru governu ne’ebé iha limitasaun koñesimentu, tanba hakarak husik hela ba públiku atu haree tanba ema barak deskobre hela problema ne’e rasik.

Nia hateten, membru governu ne'ebé to’o oras ne’e seidauk kompletu mós sei afeta ba ezekusaun OJE 2019 nian karik Xefe Estadu promulga.

Tanba ne’e, Xefe estadu ho Xefe Governu presiza tebes halo negosiasaun nafatin hodi buka solusaun ba problema Estadu nian liu husi pás no estabilidade.

Rate this item
(0 votes)

Independente Digital TV