Tersa, 18 Dezembru 2018 | Login
Ministru Defeza no Seguransa, Filomeno Paixão Ministru Defeza no Seguransa, Filomeno Paixão

MD Kometimentu Hadi'a Lakuna iha PNTL Featured

DILI: Ministru Defeza no Seguransa (MDS) kontinua tau importánsia ba Polisia Nasionál Timor-Leste (PNTL), hodi rezolve problema ne’ebé akontese iha instituisaun laran durante ne’e.

Ministru Defeza no Seguransa, Filomeno Paixão, preokupa ho kondisaun ne’ebé instituisaun enfrenta. Prezensa nu’udar ministru buka atu hadi'a lakuna iha instituisaun ne’e atu ba oin bele sai di'ak liu.

“Ami ko’alia uitoan ami nia problema, komesa husi leten kedas, hahú husi lejizlasaun, prosedimentu no asaun komandu nian”, tenik nia, iha Eskuadra PNTL Kaikoli, horisehik.

Ministru ne’e akresenta, husi inísiu PNTL enfrenta ona problema. Depois akontese tan ho kazu Kuluhun ne’e mak sai polémika liután.

Ne’e duni, husi enkontru ne’ebé realiza iha Segunda (3/12) hamutuk ho superiór PNTL nian, atu buka solusaun hodi hadi’a frakeza no lakuna sira atu ba oin labele akontese tan.

“Ita lakohi membru ida halo tiha problema depois boot sira mak ba husu deskulpa. Ne’e labele akontese tan, tenke para ona”, tenik Paixão.

Membru Governu ne’e hatutan, husi akontesimentu Kuluhun no kazu sira seluk, agora daudaun mosu ema sivíl halo asaun hasoru Polisia, kuaze membru Polisia lubuk ida mak hetan agresaun fíziku no tenke hetan tratamentu iha ospitál.

Tuir nia, kazu sira ne’e atu fó lisaun boot ba PNTL atu hadi’a aan. Tan ne’e, nu’udar ministru prontu atu hadi’a instituisaun ne’e atu bele la’o di’ak liu tan pelumenus bele hanesan ho instituisaun Forsa Defeza nian.

Read 160 times
Rate this item
(0 votes)