×

Atenção

JUser: :_load: Não foi possível carregar usuário com ID: 425

Fenómenu Fahe Osan iha Kampaña Featured

By INDEPENDENTE Jullu 04, 2017 1074
Ilustrasaun fahe osan iha prosesu eleisaun Ilustrasaun fahe osan iha prosesu eleisaun

Kampaña lejizlativa ba períodu 2017-2022 la’o ona semana rua. Iha períodu ajitasaun polítika husi partidu polítika kuaze la’o di’ak ona, maski nune’e iha buat balun ne’ebé sei presiza hadi’a nafatin.

Informasaun pratika fahe osan ba partisipante kampaña sa'e makaas. Partidu polítiku balun keixa malu kona-ba pratika ne’ebé sira hetan iha terrenu.

Polítika osan iha kampaña eleitorál la’ós ona fenómenu foun, akontese iha kuaze kampaña polítika hotu-hotu.

Kandidatu lejizlatura sira tenke lamas bolsu hodi aluga karreta, hola hahán, uniforme partidu nian no osan sigarru ka pulsa ba partisipante sira. Situasaun ne’e mak halo kampaña sai karun liután, tanba partidu polítiku sira tenke prepara-aan didi'ak hodi 'kokir' karteira.

Fahe Osan Arrogánsia ba Ukun

Haree ba situasaun ne’e Vise-Segundu Sekretaria Jerál Partidu Demokrátiku (PD), Júlio Sarmento ‘Meta-malik’ hatete, partidu demokrátiku durante eziste laiha osan atu fahe ba militante sira hodi halo servisu ba atividade partidu nian iha territóriu laran tomak.

“Imi mak servisu makaas hodi haboot Partidu Demokrátiku ba beibeik, maibé partidu laiha osan atu fó ba imi, tanba PD lakohi lori osan hodi sosa imi nia votu”, tenik nia, liu husi kampaña komísiu, iha Munisípiu Bobonaru foin lalais ne’e.

Nia hatutan, partidu balun fakar osan hodi sosa votu. Ne’e hatudu arrogánsia hodi ukun, maibé laiha planu di'ak ba dezenvolvimentu nasionál hodi hadi’a povu nia moris iha períodu tinan lima nia laran.

Tanba ne’e, nia dehan, povu Timor tomak tenke matenek ona hodi fihir partidu ne'ebé fuan ho laran moos hakarak dezenvolve duni rai hodi bele dezenvolve povu nia moris iha futuru.

Timor Laiha Kostume Fahe Osan

Entretantu, antes ne’e, populasaun iha Postu Administrasaun Lolotoe, Munisípiu Bobonaru, keixa ba Prezidente Prezidente Partidu Libertasaun Populár (PLP), Taur Matan Ruak katak, partidu balun fó osan ba sira hodi ba tuir nia kampaña lejizlativu.

Tanba ne’e, nia konsidera eleisaun parlamentár períodu ne’e mai ho modelu hanesan autonomia no referendu, tanba iha partidu balun lori osan hodi hamaus povu sira atu ba tuir sira nia kampaña.

“Ita moe kuandu ida ne’e akontese duni tanba ne’e la’ós kostume Timor nian”, dehan nia.

Brigada FRETILIN Rekoñese Simu Osan

Organizasaun Brigada Nikolau Lobato Partidu FRETILIN iha Likisá, rekoñese sira nia membru balun ba partisipa iha atividade partidu balun tanba hakarak simu osan.

Sekretáriu Organizasaun Brigada Nicolau Lobato Partidu FRETILIN, Munisípiu Likisá, Guilhermina dos Santos hateten, iha membru balun husi organizasaun ne’e partisipa iha kampaña lejizlativu husi partidu seluk tanba hakarak hetan osan.

“Ami nian ba partisipa atividade partidu ne’e tanba de’it atu hetan osan, la’ós intensaun atu tama fali ba partidu ne’e”, dehan Guilhermina.

CNRT La Lori Osan Sosa Ema

Koordenadór Partidu CNRT Munisípiu Likisá, Domingos dos Santos hateten, CNRT mós nunka lori osan atu sosa militante partidu seluk hodi afilia tama ba CNRT.

Koordenadór ne’e rejeita totál informasaun kona-ba CNRT lori osan maka bolu militante seluk tama ba partidu ne’e.

Tuir nia katak, CNRT la promete ba militante sira atu hetan osan, maibé bainhira partidu CNRT manan iha eleisaun ida ne’e sei lori dezenvolvimentu ba povu tomak iha nasaun Timor Leste ida ne’e.

CNRT Fahe Osan Informasaun Falsu

Prezidente Konsellu Diretiva Nasionál (CDN) Dionísio Babo Soares, klarifika katak informasaun ne’ebé espalla iha públiku katak CNRT fahe osan ne’e falsu.

“Informasaun ida bosok-teen ne’e, tenke identifika loloos no labele lori komunidade no povu nia naran dehan CNRT sosa votu”, dehan nia.

Polítika ne’e, nia konsidera la'ós polítika ativismu, maibé polítika estesionista ne’ebé ko’alia uitoan maibé halo barak, la'ós hatenu maka barak mais la halo buat ida.

CNRT nia polítika laiha ida atu sosa votu ka fahe osan ba militante no simpatizante sira. Tanba ne’e, nia husu atu hatudu labele halo propaganda polítika oioin.  

Rate this item
(0 votes)

Independente Digital TV